У Расеі судзяць беларуса :: Хартыя'97 :: Навiны

Мыцішчынскі гарадскі суд пачаў разгляд крымінальнай справы грамадзяніна Беларусі Паўла Ждановіча. Ён быў арыштаваны ў верасні мінулага года па абвінавачванні ва ўвозе ў Расею лекавых сродкаў, якія змяшчаюць наркотыкі.

Ждановіч абвінавачвае супрацоўнікаў Упраўлення Федэральнай службы па кантролі за абарачэннем наркотыкаў па Маскоўскай вобласці ў правакацыі.

Павел Ждановіч быў затрыманы 12 верасня 2006 года. Як распавёў брат затрыманага Віталь, Павел Ждановіч займаўся продажам лекаў праз Інтэрнэт. У пачатку восені ён атрымаў замову на 30 упаковак прэпарата "Тусcал". Прычым Ждановіча настойліва прасілі асабіста прывезці лекі ў Падмаскоўе. Заказчык скардзіўся, што «пакутуе на хранічны бранхіт». Як высветлілася пазней, ролю кліента сыграў афіцэр Федэральнай службы па кантролі за абарачэннем наркотыкаў (ФСКН). Ледзь Ждановіч апынуўся ў прызначаным месцы на вакзале ў Мыцішчах, як яго ўзялі пад варту.

Адвакат Ждановіча Яўгеній Чарнаўсаў нагадаў, што Вярхоўны суд у чэрвені мінулага года забараніў супрацоўнікам праваахоўных органаў выкарыстоўваць правакацыю ў справах, звязаных з наркатычнымі або псіхатропнымі рэчывамі.

Тым часам аналагічны выпадак адбыўся 7 сакавіка ўжо гэтага года, калі ў Маскве былі затрыманыя і па гэтай дзень чакаюць суду беларусы Аляксандр Чачураў і Сяргей Лагун. Гэтым разам «пакупнікі» замовілі ўжо адну тысячу ўпаковак лекаў.

Група вядомых расейскіх праваабаронцаў выступіла ў абарону беларуса Паўла Ждановіча.

«Тусcал» свабодна прадаецца ў беларускіх аптэках, – растлумачыла старшыня Маскоўскай Хельсінкскай групы Людміла Аляксеева. – У нас таксама прадаецца, але адвольна занесены ў спісы псіхатропных сродкаў. А справа ўся ў тым, што ніхто не ведае пра забарону такіх лекаў. Бо і ў "Колдрэксу" ёсць псіхатропныя рэчывы, таму, калі ў вас тэрмін прыдатнасці таблетак мінуў, выкідвайце іх, інакш да вас могуць прыйсці людзі з наркакантролю і арыштаваць за пазапраўнае захоўванне псіхатропных рэчываў».