Мікіта Сасім распавядае падрабязнасці свайго затрымання :: Хартыя'97 :: Навiны

Моладзевага лідэра Мікіту Сасіма прывезлі ў суд Цэнтральнага раёна Менска. Прэс-цэнтру Хартыі’97 атрымалася пагаварыць з актывістам па тэлефоне. «Мяне затрымлівалі некалькіх людзей у цывільным, судзячы па целаскладзе – супрацоўнікі АМАПа. Схапілі, заламалі рукі і запіхнулі ў машыну. Пры гэтым паводзілі сябе вельмі груба – парвалі кашулю, нанеслі некалькі ўдараў па спіне і нагам, пагражалі, што паб’юць», – распавёў актывіст.

Па словах Сасіма, адразу пасля затрымання яго адвезлі ў Цэнтральны РУУС Менска, пасадзілі ў камеру і не праводзілі ніякіх допытаў. Толькі сёння раніцай ён убачыў пратакол затрымання – актывіста абвінавачваюць у здзяйсненні дробнага хуліганства, нібыта ён нецэнзурна выказваўся. Дадзены адміністрацыйны артыкул сёння актыўна выкарыстоўваецца беларускай міліцыяй для апраўдання палітычна матываваных арыштаў. Моладзеваму лідэру пагражае да 15 сутак арышту.

Адзначым, што ўчора ў Цэнтральным РУУС Менска ўпэўнівалі, што Мікіты Сасіма сярод затрыманых няма. Такім чынам, міліцыя адкрыта хлусіла не толькі праваабаронцам і журналістам, але і сваякам затрыманага.

Само затрыманне Сасіма інакш як выкраданнем не назавеш. Яго схапілі невядомыя людзі ў цывільным, не прад`явіўшы ніякіх дакументаў. Пасля запіхнулі ў машыну і павезлі ў невядомым напрамку. Такія бандыцкія напады на прадстаўнікоў апазіцыі ў апошнія гады носяць масавы характар. Дзіўна, што еўрапейская грамадскасць дагэтуль не надала гэтым фактам належнай увагі.