Імідж «Газпрома» будуць падтрымліваць піяршчыкі Крамля :: Хартыя'97 :: Навiны

Падтрымліваць сувязі "Газпрома" з замежнымі СМІ, дзяржорганамі і грамадскімі арганізацыям будзе кансорцыум піар-агенцтваў, у які, у прыватнасці, уваходзіць амерыканская Ketchum, якая з 2006 года прасоўвае пазітыўны вобраз Расеі за мяжой па кантракце з Крамлём. Пра гэта паведамляе газета "Время новостей" са спасылкай на прадстаўнікоў замежных выданняў і "Газпрома".

Акрамя Ketchum, у кансорцыум уваходзіць таксама кампанія Gavin Anderson з штаб-кватэрай у Токіо і GPlus, якая размяшчаецца ў Брусэлі. Па словах прадстаўнікоў "Газпрома", кіраўніком кансорцыума з`яўляецца Gavin Anderson.

Крыніца выдання ў газавай манаполіі сцвярджае, што тэндэру не было, аднак "Газпром" выбіраў з чатырох прапаноў. Паводле інфармацыі «Времени новостей» раней расейская кампанія хацела падпісаць кантракт з кампаніяй PBN, але, па-першае, пра гэта заўчасна стала вядома ў прэсе, а, па-другое, піар-група ўдзельнічала ў кампаніі па пераносе помніка Бронзаваму салдату ў Таліне.

"Газпром" мае патрэбу змяніць свой імідж на Захадзе пасля "газавай вайны" з Украінай у канцы 2005-га – пачатку 2006 гадоў.

У Крамлю паслугамі Ketchum і ў меншай ступені Gavin Anderson і GPlus карысталіся ў 2006 годзе, калі Расея старшынствавала ў "вялікай васьмёрцы". На пачатку 2007 года супрацоўніцтва было падоўжанае яшчэ на год.