Стыхійны мітынг на Ждановічах :: Хартыя'97 :: Навiны

Больш за 100 прадпрымальнікаў узялі ўдзел у стыхійным мітынгу, у які вылілася спроба падатковых органаў канфіскаваць партыю тавару ў адной з крам на рынку ў Ждановічах.

19 жніўня падатковыя органы праводзілі на рынку рэйдавую праверку. Падчас праверак адной з крам, што гандлюе футрамі і размяшчаецца на трэцім паверсе гандлёва-выставачнага цэнтра "Мир моды – 3", прадавец не змог прад`явіць падаткавікам адзін з дакументаў. Сярод папер, якія ім былі прад`яўленыя для праверкі, не апынулася дазволу ад імя ўладальніка тавару рэалізоўваць яго прадаўцом або крамай, паведаміў БелаПАН адзін з прадпрымальнікаў – удзельнікаў інцыдэнту. Правяраючыя заявілі, што ў сувязі з гэтым увесь тавар, які ёсць у краме, – прыкладна на 100 тысяч даляраў – падлягае вопісу і будзе канфіскаваны. Довады гандляроў наконт таго, што яны не ведалі пра новаўвядзенне, не падзейнічалі.

Гэта выклікала бурны пратэст гандляроў трэцяга паверху выставачнага цэнтра, дзе размешчаныя крамы скураных і футравых вырабаў. Людзі, якія сабраліся вакол правяраючых, выказвалі абурэнне з нагоды дадзенага, па іх словах, “бясчынства". Іх падтрымалі прадпрымальнікі і прадаўцы, якія гандлявалі на іншых паверхах "Мира моды". У выніку на трэцім паверсе гандлёвага цэнтра сабраліся каля 100 чалавек, для якіх інцыдэнт стаў падставай распавесці прадстаўнікам улады пра свае праблемы. У прыватнасці, яны заявілі, што падатковыя і іншыя правяраючыя органы вядуць сапраўдную вайну з прадпрымальнікамі, не інфармуюць іх пра змены заканадаўства, увесь час уводзяць новыя патрабаванні ў справаздачнасці, канфіскоўваюць тавар.

У выніку да месца стыхійнага мітынгу прыбылі супрацоўнікі міліцыі і яго ўдзельнікі былі змушаныя разысціся.