Сёння судзяць Паўла Севярынца :: Хартыя'97 :: Навiны

Суд над моладзевым лідэрам Паўлам Севярынцам прызначаны на 21 жніўня. Пра гэта паведаміў адвакат апазіцыйнага палітыка Павал Алесік. Па словах адваката, Севярынцу інкрымінуецца правапарушэнне, прадугледжанае часткай 3 артыкула 23.34 Кодэкса аб адміністрацыйных правапарушэннях (парушэнне ўсталяванага парадку правядзення масавых мерапрыемстваў паўторна цягам года).

Гаворка ідзе пра прэзентацыю кнігі П.Севярынца "Лісты з лесу", якая праходзіла 19 жніўня ў офісе берасцейскай арганізацыі Партыі БНФ. Падчас мерапрыемства былі затрыманыя аўтар кнігі і яшчэ 30 удзельнікаў сустрэчы. Супрацоўнікі міліцыі, якія ўварваліся ў офіс партыі, заявілі: да іх паступіў ананімны званок пра тое, што па гэтым адрасе сабраліся злачынцы.

Пасля затрымання Севярынец правёў каля сямі гадзін у аддзяленні міліцыі Маскоўскага РУУС Берасця. Пасля яго адпусцілі, уручыўшы позву з загадам з`явіцца 20 жніўня ў АУС Маскоўскага раёна.

Учора проста з аддзялення міліцыі палітыка павезлі ў суд Маскоўскага раёна, аднак у сувязі з тым, што гэта адбывалася ў канцы працоўнага дня і з прычыны памылак у пратаколе, было прынятае рашэнне перанесці працэс на сёння. Да суду Павал Севярынец знаходзіўся ў следчым ізалятары.