Леанід Злотнікаў: «У нас сур`ёзныя эканамічныя цяжкасці» :: Хартыя'97 :: Навiны

Расея адмовіла Беларусі ў просьбе завезці 30 тыс. тон цукру дадаткова да аб`ёмаў, прадугледжаным міжурадавым пагадненнем. Да таго ж, сёння стала вядома, што перамовы па экспарце ва Украіну цукровага бурака, якія вядзе Беларусь, таксама наўрад ці увянчаюцца поспехам. «Сёння ў нас заводы, арыентаваныя на вытворчасць цукру для продажу ў Расею, зазнаюць сур`ёзныя эканамічныя цяжкасці», – каментуе сітуацыю ў беларускай цукровай прамысловасці ў інтэрв`ю прэс-цэнтру Хартыя’97 эканаміст Леанід Злотнікаў.

Раней Беларусь узяла на сябе абавязальніцтва абмежаваць пастаўкі цукру ў Расею ў 2007 годзе да 180 тыс. тон, у 2008 годзе – да 100 тыс. тон. Такія аб`ёмы былі замацаваныя міжурадавай дамовай аб пастаўках цукру, якая была падпісаная 23 сакавіка гэтага года ў Менску. «Гаворка ішла пра часовыя абмежаванні на ўвоз беларускага цукру. Міністр сельскай гаспадаркі Расеі тады зазначыў, што праз 2 гады беларускі цукар будзе неканкурэнтаздольны. І сапраўды, Расея зрабіла істотныя крокі ў мадэрнізацыі сваёй цукровай прамысловасці. За 5 месяцаў гэтага года вытворчасць цукру ў Расеі павялічылася на 140% у параўнанні з аналагічным перыядам мінулага года», – заяўляе Леанід Злотнікаў.

На думку эксперта, перспектыў на расейскім рынку ў нас няма. Тое ж самае можна сказаць і пра Украіну. «Паўднёвая прадукцыя адрозніваецца падвышанай цукрыстасцю. Акрамя таго, цукровыя заводы Украіны належаць у асноўным прыватным структурам, якія працуюць больш эфектыўна», – адзначыў Злотнікаў.

«У выніку абмежаванняў, уведзеных Расеяй, экспарт беларускага цукру за апошнія чатыры месяцы скараціўся ледзь ці не на 50%. Скарацілася і вытворчасць. Калі раней мы выраблялі каля паўмільёна тон цукру і большую яго частку адпраўлялі ў Расею, то цяпер нам даводзіцца разлічваць на свой абмежаваны рынак. Заводы арыентаваныя на вытворчасць цукру для продажу ў Расею цяпер зазнаюць сур`ёзныя эканамічныя цяжкасці. Бо пад мадэрнізацыю іх вытворчасцяў былі ўзятыя крэдыты, якія цяпер трэба аддаваць, а аддаваць сёння яны могуць толькі цукрам», – падагульняе эксперт.