У ізалятары галадае прадпрымальніца :: Хартыя'97 :: Навiны

У следчым ізалятары Віцебска галадае жанчына-прадпрымальніца. Святлана Дваранінава абвясціла галадоўку 21 жніўня. Як паведаміла БелаПАН адвакатка Наталля Тарасюк, 13 жніўня С.Дваранінава была прысуджаная судом Кастрычніцкага раёна Віцебска да шасці з паловай гадоў пазбаўлення свабоды па двух артыкулах Крымінальнага кодэкса: 209 (махлярства) і 210 (крадзеж шляхам злоўжывання службовымі паўнамоцтвамі).

Дваранінава з`яўлялася саўладальнікам ТАА "Акварыус", якое займалася аптовым гандлем і швейнай вытворчасцю. У прадпрыемства ўзніклі эканамічныя праблемы: яно не здолела разлічыцца за атрыманы без перадплаты тавар. Крымінальная справа ў дачыненні С.Дваранінавай была ўзбуджаная ў 2004 годзе, а ў 2006-м яе асудзілі на 8 гадоў пазбаўлення свабоды. Прысуд быў абскарджаны адвакатам і справу накіравалі на дадатковае расследаванне. У выніку 13 жніўня гэтага года суд Кастрычніцкага раёна Віцебска вынес новае рашэнне.

Н.Тарасюк лічыць прысуд суду несправядлівым, бо, па яе словах, з "справы было відаць, што Дваранінава атрымлівала тавар у адной фірме і аддавала яго іншай – гэта значыць не мела асабістай выгады". "Акрамя таго, – адзначыла адвакатка, – суд не выявіў фактаў абнаяўлення буйной сумы грошай, што таксама сведчыла б пра віну падсуднай".

Па словах Н.Тарасюк, яе падабаронную, магчыма, было б дарэчы абвінаваціць ва ўхіленні ад выканання крэдыторскіх абавязальніцтваў, але ніяк не ў махлярстве і крадзяжы.

21 жніўня С.Дваранінава падала скаргу ў Віцебскі абласны суд і абвясціла галадоўку.