Смерць ў Беларусі літоўскага дыпламату перастане быць тайнай :: Хартыя'97 :: Навiны

Прэм`ер-міністр Літвы Гедымін Кіркілас дапускае магчымасць апублікавання матэрыялаў крымінальнай справы аб смерці ў Беларусі былога супрацоўніка Дэпартамента дзяржбяспекі (ДГБ), дарадцы генеральнага консульства Літвы ў Гародні Вітаўтаса Поцюнаса.

"Сітуацыя, калі ў грамадстве ходзяць розныя версіі наконт смерці афіцэра, калі распаўсюджваюцца міфы, не з`яўляецца нармальнай, таму, відаць, варта б гэта зрабіць", – сказаў кіраўнік урада ў чацвер у інтэрв`ю мясцоваму прыватнаму радыё Ziniu radijas ("Радыё навін").

Аднак Г.Кіркілас звярнуў увагу, што змест крымінальнай справы можа быць выдадзены толькі пасля прыняцця рашэння ў судзе.

В.Поцюнас 23 жніўня мінулага года загінуў у Берасці, выпаўшы з акна дзевятага паверху гасцініцы. Паводле вынікаў расследавання Генеральная пракуратура Літвы прыняла рашэнне спыніць дасудовае расследаванне, матывуючы гэта тым, што " смерць В.Поцюнаса наступіла не з прычыны злачынных дзеянняў іншых асоб, а з прычыны няшчаснага выпадку".

Некалькі месяцаў таму ўдава загінуўшага афіцэра дзяржбяспекі звярнулася ў Генпракуратуру з просьбай аднавіць расследаванне, але адказ атрымала адмоўны. Адмову Генпракуратуры яна абскардзіла ў судзе, а ў мясцовых СМІ пачалі распаўсюджвацца чуткі, што, нібыта супрацоўнік ДГБ мог загінуць ад рук супрацоўнікаў спецслужб Беларусі або Расеі.

Пасля распаўсюджвання такіх чутак прэм`ер-міністр быў змушаны сфармаваць працоўную групу для вывучэння акалічнасцяў смерці В.Поцюнаса.