Расея не прадасць Беларусі С-400 :: Хартыя'97 :: Навiны

"У самыя блізкія некалькі гадоў паставак ЗРС С-400 за мяжу, у тым ліку краіны СНД, па аб`ектыўных прычынах не будзе. Рашэнне аб пастаўках можа быць прынятае толькі вышэйшым кіраўніцтвам нашай краіны", – пракаментавала «РИА Новости» высокапастаўленая крыніца ў расейскім ОПК заяву міністра абароны Беларусі генерал-палкоўніка Леаніда Мальцава пра намер закупіць С-400.

Эксперт нагадаў, што Мінабароны Расеі зрабіла вялікі заказ на гэтую сістэму. Усе вытворчыя магутнасці прадпрыемстваў ВПК на самую блізкую перспектыву занятыя выкананнем гэтай замовы.

Міністр абароны Беларусі заявіў пра планы закупіць С-400 падчас вучэнняў аб`яднанай сістэмы СПА СНД "Баявая садружнасць–2007" на палігоне Ашулук (Астраханская вобласць).

Раней гендырэктар НПО "Алмаз" Ігар Ашурбейлі заяўляў, што выраб С-400 на экспарт можа пачацца ў 2009 годзе. "Цягам двух гадоў мы абкатаем гэты комплекс у войсках, каб выглядаць годна (на рынку), магчыма, выявяцца нейкія недахопы, і пасля атрымання досведу эксплуатацыі з 2009 года мы можам пачаць выраб на экспарт", – заяўляў ён.

ЗРС С-400 прызначаная для паразы ўсіх тыпаў лятальных апаратаў – самалётаў, беспілотных лятальных апаратаў і крылатых ракет. Максімальная далёкасць стральбы комплексу па аэрадынамічных цэлях – каля 400 кіламетраў, вышыня – больш за 30 кіламетраў.