Расея можа адмовіцца ад вайсковых баз у Беларусі :: Хартыя'97 :: Навiны

У перспектыве Расея плануе адмовіцца ад радыёлакацыйных станцый (РЛС) сістэмы папярэджання аб ракетным нападзе, размешчаных за межамі яе тэрыторыі. Пра гэта, паводле інфармацыі расейскіх СМІ, заявіў камандуючы касмічнымі войскамі РФ генерал-палкоўнік Уладзімір Папоўкін на авіякасмічным салоне "МАКС-2007" 23 жніўня.

Паводле яго слоў, расейскія касмічныя войскі "плануюць ухадзіць з РЛС за межамі Расеі", каб не ставіць абароназдольнасць краіны ў залежнасць ад "чужых палітыкаў". "Упэўніваю, што "дзір" у сістэме папярэджання ракетнага нападу ў нас няма, – сказаў Папоўкін. – Разам з тым існуе пытанне, якое звязанае з станцыямі, размешчанымі па-за тэрыторыяй нашай краіны – ва Украіне, у Азербайджане, у Казахстане і Беларусі", – паведамляе БелаПАН.

Па словах генерал-палкоўніка, у выпадку ўзнікнення якога-небудзь канфлікту можа з`явіцца "спакуса выкарыстаць для ціску на нас сам факт існавання гэтых РЛС". "Напрыклад, адключэннем электраэнергіі ад нашых аб`ектаў сістэмы папярэджання аб ракетным нападзе", – растлумачыў У.Папоўкін.

У Беларусі дзейнічаюць два вайсковыя аб`екты Расейскай Федэрацыі – радыёлакацыйная станцыя "Волга" сістэмы папярэджання аб ракетным нападзе (Ганцавічы, Берасцейская вобласць) і цэнтр далёкай сувязі Ваенна-марскога флоту Расеі (Вілейка, Менская вобласць). Паводле розных дадзеных, на гэтых аб`ектах праходзяць службу каля 900 вайскоўцаў і працуюць больш за 500 асоб грамадзянскага персаналу.