«Guardian» пра ціск на «Свабодны тэатр» :: Хартыя'97 :: Навiны

Брытанская газета "Guardian" паведамляе пра інцыдэнт пад Менскам, дзе беларускі АМАП сарваў спектакль паўпадпольнага "Свабоднага тэатра" па п`есе брытанскага драматурга Эдварда Бонда "11 кашуль".

Іншы вядомы брытанскі драматург Том Стопард, які падтрымлівае "Свабодны тэатр" цягам некалькіх гадоў, паведаміў Guardian, што даведаўся пра інцыдэнт з тэкставага паведамлення, якое яму даслаў адзін з рэжысёраў тэатра, арыштаваны ў Менску разам з яшчэ 50 людзьмі, якія бралі ўдзел у праглядзе спектакля.

"Можна было спадзявацца, што час, калі артыстаў арыштоўваюць за свабодныя выказванні былі пахаваныя разам з таталітарнымі рэжымамі, але Беларусь – самы таталітарны рэжым з наяўных сёння ў Еўропе", – сказаў у інтэрв`ю Guardian Том Стопард.

"Свабодны тэатр" разгневаў рэжым Лукашэнкі, калі правёў гэтым летам сустрэчы з сваімі прыхільнікамі за мяжой, сярод якіх такія знакамітасці як Мік Джагер і Вацлаў Гавел.