КДК падчышчае шэрагі службоўцаў у Менску :: Хартыя'97 :: Навiны

Звольнены галоўны менскі будаўнік Вячаслаў Кушнер. Амаль у гэты самы час вызвалілася крэсла кіраўніка Менскага райвыканкама.

Адразу два буйныя службоўцы звольненыя на гэтым тыдні. Вячаслаў Кушнер займаў пасаду намесніка мэра Менска па будаўніцтве, Міхаіл Глінскі быў старшынёй Менскага райвыканкама.

– Нам, супрацоўнікам, паведамілі пра звальненне Вячаслава Якаўлевіча Кушнера ў панядзелак, 20 жніўня, на планёрцы, – распавялі «КП в Беларуси» ў прэс-службе Менгарвыканкама. – Ён звольніўся з фармулёўкай «па ўласным жаданні». Выканаўцай абавязкаў намесніка старшыні па будаўніцтве цяпер прызначаны дырэктар УКС Менгарвыканкама Андрэй Уладзіміравіч Галь. Як паказвае практыка, той, хто становіцца в.а., потым рэдка займае гэтую пасаду…

Дзе цяпер Вячаслаў Кушнер і чым ён будзе займацца, у Менгарвыканкаме не кажуць. Цяжка паверыць, што галоўны менскі будаўнік сам сышоў з прэстыжнай пасады. Тут можна ўспомніць, што менш як месяц таму міністр архітэктуры і будаўніцтва Аляксандр Селязнёў даклаў Аляксандру Лукашэнку: Менск не выканаў план па будаўніцтве жылля. За паўгода было пабудаванае толькі 72%.

Звальненне другога буйнага службоўцы, кіраўніка Менскага райвыканкама Міхаіла Глінскага таксама мала нагадвае сыход па ўласным жаданні. Хоць у райвыканкаме кажуць, што ён сышоў сам:

– Ён не працуе з серады, з 22 жніўня, – распавялі ў райвыканкаме. – Абавязкі цяпер выконвае Сяргей Рута, намеснік старшыні райвыканкама па будаўніцтве.

Прычына звальнення Глінскага відавочная: апошнім часам камітэт Дзяржкантролю актыўна правяраў, як вылучаюць зямельныя ўчасткі ў Менскім раёне. Кантралёры знайшлі факты грубага парушэння заканадаўства аб зямлі: самавольнае заняцце зямель, пазапраўны захоп лесу, падаванне і канфіскацыя ўчасткаў з парушэннем закона.

– Бяда наша ў тым, што службовыя асобы не выконваюць свае прафесійныя абавязкі, – заявіў старшыня КДК Зянон Ломаць пасля праверкі. Мабыць, цяпер на змену службоўцам, якія правініліся, будуць шукаць больш адказных людзей.