Не спраўдзіцца яшчэ адна мара Лукашэнкі :: Хартыя'97 :: Навiны

Перамовы паміж адміністрацыяй Парку высокіх тэхналогій і найбольш верагодным інвестарам у яго будаўніцтва, паўднёваафрыканскай кампаніяй Lyons Financial Solutions, зашлі ў тупік. А гэта значыць, што стварэнне "гораду-саду" на вылучанай дзяржавай пляцоўцы пад беларускую Сіліконавую даліну, зноў адкладаецца.

Каменем перапоны, паводле інфармацыі крыніц «Завтра твоей страны», сталі ўмовы, на якіх абодва бакі павінны былі інвеставаць сродкі ў архітэктурна-будаўнічую частку праекту. Беларускі бок першапачаткова ў якасці свайго ўкладання ў сумеснае прадпрыемства вызначыў зямельны ўчастак. Ён быў ацэнены, зыходзячы з кадастравага кошту – 100 даляраў за 1 кв. м. (або каля 500 млн. даляраў за 50 гектараў). З паўднёваафрыканцаў за 50% долю ва ўпраўленні папрасілі такую ж суму, уключыўшы ў іх абавязковае стварэнне адпаведнай інфраструктуры.

Але прадстаўнікі Lyons Financial Solutions з гэтым не пагадзіліся, лічачы, што пра стварэнне адпаведнай інфраструктуры павінны падбаць альбо сама адміністрацыя парку, альбо гарадскія ўлады. Праблема ў тым, што ў адміністрацыі няма такіх грошай, а менскія ўлады таксама не зацікаўленыя ў дадатковых інвестыцыях у гэты аб`ект: ён і так не ўпісваецца ў горадабудаўнічыя планы мэрыі, а галоўнае, не абяцае гораду прыбыткаў.