Мінюст вынес папярэджаньні тром апазіцыйным партыям :: Хартыя'97 :: Навiны

Сёньня Міністэрства юстыцыі вынесла папярэджаньне Партыі БНФ, Беларускай партыі “Зялёныя” і БСДП (Грамада). Як заяўляе мінюст, згодна з законам палітычныя партыі павінны мець Менскую гарадзкую і абласныя арганізацыйныя структуры ня менш чым у чатырох абласьцях.

Мін’юст заяўляе, што нягледзячы на патрабаваньні і папярэджаньні, згаданыя партыі дагэтуль не ўтварылі неабходнай колькасьці арганізацыйных структур. У выпадку далейшага ігнараваньня закону можа быць пастаўлена пытаньне аб прыпыненьні іх дзейнасьці альбо аб ліквідацыі ў судовым парадку.

Партыя БНФ не згодная з рашэннем Мінюсту. “Мы разглядаем гэты факт не з юрыдычный, а з палітычнай кропкі гледжання. Думаю, ідзе падрыхтоўка да парламенцкіх выбараў. Мы спрабавалі зарэгістраваць арганізацыйныя структуры і ў Гарадзенскай, і ў Гомельскай абласцях, але мясцовыя ўлады ціснулі на ўласнікаў памяшканняў, і мы не змаглі знайсці юрыдычныя адрасы. Таму атрымліваецаа “замкнутае кола” – патрабуюць і не даюць зарэгістравацца. Дадзенае папярджанне цалкам адпавядае стратэгіі ўлады па падрыхтоўцы да палітычных кампаній. Напярэдадні парламенцкіх выбараў 2004 году былі ліквідаваныя грамадскія арганізацыі і праваабарончыя цэнтры. Тое ж самае было ў 2001 годзе. Зараз першым сігналам стала прыпыненне дзейнасці Партыі камуністаў беларускай. Магчыма, падыйшла чарга трох іншых партый”, -- заявіў прэс-цэнтру Хартыі’97 старшыня юрыдычнай камісіі Партыі БНФ Уладзімір Лабковіч.

За 2006-2007 гэта трэцяе Партыі БНФ папярджанне і існуе рэальная пагроза закрыцця партыі.