Леанід Заіка: Адмоўнае сальда ў гандлі з Расеяй складзе 6 мільярдаў :: Хартыя'97 :: Навiны

Адмоўнае сальда знешняга гандлю Беларусі ў 2007 годзе можа скласці $2,1 млрд., або 4,8% да ВУП, паведаміў учора міністр эканомікі Беларусі Мікалай Зайчанка. Прэс-цэнтр Хартыя’97 папрасіў пракаментаваць прагноз міністра кіраўніка аналітычнага цэнтра «Стратэгія» Леаніда Заіку.

«Агульную негатыўную карціну гандлёвага сальда абумаўляюць эканамічныя стасункі з Расеяй. Паводле маіх падлікаў, адмоўнае сальда ў гандлі з Расеяй складзе каля 6 мільярдаў даляраў, – заявіў эканаміст. – Перад міністрам эканомікі пастаўленая задача па паніжэнні адмоўнага гандлёвага сальда, і ён будзе спрабаваць яе вырашыць. Па маіх жа падліках, па выніках года адмоўнае сальда ў гандлі з Расеяй складзе каля 6 мільярдаў даляраў».

На думку аналітыка, цяпер урад імкнецца ліквідаваць гэты правал: павялічаныя продажы калійных угнаенняў, беларускіх трактароў, аўтамабіляў, вядзецца актыўны пошук новых рынкаў. «Але праблемы адмоўнага сальда з Расеяй вырашыць не атрымаецца. Максімум, што можна будзе дамагчыся, – гэта знізіць яго да 5 мільярдаў даляраў», – мяркуе Заіка.

Праблемы з аплатным балансам абумоўленыя, акрамя адмоўнага сальда з Расеяй, адсутнасцю замежных інвестыцый і малаважным крэдытаваннем эканомікі звонку. Прысвоеныя нядаўна крэдытныя рэйтынгі, як лічыць эканаміст, таксама няздольныя выправіць сітуацыю з знешнім крэдытаваннем.

«Праблема сальда абумоўленая дрэннай прамысловай і эканамічнай палітыкай, на якую Мікалай Зайчанка паўплываць не ў сілах» , – падагульняе Леанід Заіка.