Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Быць разам – у Еўразвязе (Фотарэпартаж) 17:49, 26/08/2007
Літоўскі рок-фэст «Be2gether» праходзіць гэтымі днямі на самай мяжы з Беларуссю. Ля падножжа сярэднявечнага замка ў Нарвелішкес вырасла намётавае мястэчка – каля 10.000 чалавек з`ехаліся ў Літву на музычны фэст. Гэта першае мерапрыемства такога роду – з канцэртамі выступаюць 60 каманд з краін Еўропы і ЗША. Лозунг мерапрыемства – «Музыка адкрывае межы». Мэта – добрасуседскія стасункі Беларусі з Еўрапейскім Звязам.
Сярод гледачоў асабліва шмат беларусаў: сцэна размешчаная ў 300 метрах ад літоўска-беларускай мяжы. Пазнаць нашых суайчыннікаў нескладана – вялізная колькасць нацыянальных бел-чырвона-белых сцягоў гаворыць сама за сябе. Лозунг «Жыве Беларусь!» і «Беларусь – у Еўропу!» гучыць падчас канцэрту гучна і практычна бесперапынку.
У фэсце бяруць удзел тры папулярныя беларускія гурты – «Ляпіс Трубяцкі», «IQ 48» і «Drum Extasy». У Норвелішкес выступаюць таксама самыя папулярныя літоўскія выканаўцы Андрус Мамантовас, "Skamp", "G&G sindikatas", "Pieno lazeriai" і літоўская выканаўца Ёана з сваім праектам "Joana and the Wolf". Таксама прыехалі самыя модныя групы з Ісландыі ("Leaves"), Фінляндыі ("Poets of the Fall"), Латвіі ("Tribes of the City") і Польшчы ("Myslovitz").
Частку сумы, атрыманай за фэставыя квіткі, арганізатары накіруюць пацярпелым ад чарнобыльскай аварыі дзецям беларускага горада Чачэрска.
Фэст праходзіць мірна і без здарэнняў. Наадварот, яго арганізатары адзначаюць высокі ўзровень культуры яго ўдзельнікаў.
«Гэта – не толькі музыка, але і выдатны музычны спектакль на скрыжаванні некалькіх культур. Апошняя мяжа ў Еўропе – жалезная мяжа. Яна разбурыцца з дапамогай музыкі. Я маю на ўвазе фізічную мяжу паміж нашымі краінамі, і не толькі фізічную, самае галоўнае – у розумах», – заявіў арганізатар фэсту Гедрус Клімкявічус.
На рок-фэст "Be2gether" у якасці гледачоў прыехалі прадстаўнікі некаторых амбасад еўрапейскіх краін у Беларусі, а таксама міністр замежных спраў Літвы Пятрас Вайцекюнас.
Нагадаем, 9 жніўня МЗС Беларусі распаўсюдзіў заяву, у якой звярнуў увагу на тое, што літоўскі бок прымае на сябе поўную адказнасць за "захаванне рэжыму дзяржаўнай мяжы і недапушчэнне інцыдэнтаў, выкліканых масавым знаходжаннем грамадзян у прымежнай паласе".
Знешнепалітычнае ведамства Літвы паспяшалася супакоіць беларускі бок. "Рок-фэст "Be2Gether" накіраваны на збліжэнне літоўскага і беларускага народаў. Літоўскі бок прыме усе неабходныя меры для гарантавання бяспекі і парадку падчас мерапрыемства", – заявіла прэс-сакратарка знешнепалітычнага ведамства Літвы.
, iнформэр
