Яраслаў Раманчук: «Калі ўлады не пойдуць на рэформы, нас чакае пагаршэнне сітуацыі» :: Хартыя'97 :: Навiны

Учора ў інтэрв`ю «Інтэрфаксу» расейскі амбасадар у Беларусі Аляксандр Сурыкаў прагназаваў цану на газ для Беларусі ў наступным годзе ў дыяпазоне ад 125 да 150 даляраў за 1000 куб. метраў. Прагноз пракаментаваў прэс-цэнтру Хартыя’97 вядомы эканаміст, кіраўнік цэнтра Мізеса Яраслаў Раманчук.

На думку эканаміста, Сурыкаў нічога новага не сказаў. Графік пераходу на сусветныя цэны на газ быў зацверджаны Беларуссю і Расеяй у канцы 2006-га года. Амбасадар чарговым разам агучыў пазіцыю «Газпрома» і Крамля па гэтым пытанні. Масква не збіраецца пераглядаць дадзенае пагадненне, на што спадзявалася Беларусь.

«Пераход на рынкавыя стасункі з Расеяй насамрэч выгодны і нам. Дадатковае павелічэнне выплат Расеі за газ на 500-700 мільёнаў даляраў у наступным годзе не смяротнае, калі яно будзе суправаджацца прыцягненнем сродкаў з-за мяжы і рэфармаваннем эканомікі», – лічыць Яраслаў Раманчук.

Калі ўлады не пойдуць на рэформы, нас, на думку эксперта, чакае далейшае пагаршэнне сітуацыі з аплатным балансам, пагаршэнне праблем у тэкстыльнай прамысловасці, энергаёмістым аўтамабілебудаванні, хімічнай прамысловасці. Чакаецца паніжэнне рэнтабельнасці прадпрыемстваў на 2-3%. Таму беларусам давядзецца істотна абмежаваць свае выдаткі, «уціснуць» бюджэт, лічыць Раманчук.

«Адзіны свой козыр напярэдадні правядзення маштабных рэформ – нізкія даўгі – мы няўхільна страчваем. Толькі сёлета нашы даўгі павялічыліся на 2 мільярды даляраў. Рэформы проста непазбежныя», – падагульняе Яраслаў Раманчук.