Дзярждэпартамент ЗША: Размяшчэнне аб`ектаў ПРА не патрабуе стварэння ў адказ вайсковых баз у Беларусі :: Хартыя'97 :: Навiны

Размяшчэнне элементаў сістэмы проціракетнай абароны (ПРА) ЗША ў Еўропе не ўяўляе пагрозы стратэгічнаму наступальнаму патэнцыялу РФ і, адпаведна, не патрабуе стварэння ў адказ ёй вайсковых баз на тэрыторыі Беларусі. Такое меркаванне выказаў намеснік начальніка прэс-службы дзярждэпартамента ЗША Том Кейсі, каментуючы ў аўторак на рэгулярным брыфінгу для журналістаў выказванні амбасадара Расеі ў Менску Аляксандра Сурыкава.

Расейскі амбасадар раней папярэдзіў пра магчымасць разгортвання ў Беларусі – у выпадку дасягнення Масквой і Менскам дамоўленасці на гэты конт – новых вайсковых аб`ектаў у адказ на стварэнне ў Польшчы і Чэхіі базы 10 ракет-перахопнікаў і станцыі радыёлакацыйнага сачэння, паведамляе ІТАР-ТАСС.

Пры гэтым расейскі дыпламат падкрэсліў, што гаворка не ідзе пра размяшчэнне Расеяй на беларускай тэрыторыі ядзернай зброі. Кейсі чарговым разам запэўніў, што "трэці пазіцыйны раён" сістэмы ПРА ЗША, які плануюць разгарнуць у Еўропе, будзе валодаць "вельмі абмежаванымі магчымасцямі". "Гэтая сістэма прызначаная для адбіцця пагрозы абмежаванага характару, якая зыходзіць ад такіх нацый, як Іран, або іншых краін на Блізкім Усходзе, здольных на нейкім этапе распрацаваць ядзерную зброю", – заявіў афіцыйны прадстаўнік знешнепалітычнага ведамства ЗША. Па яго словах, база супрацьракет у Польшчы і радар у Чэхіі "не ўяўляюць цалкам ніякай пагрозы або выкліку стратэгічнаму ядзернаму патэнцыялу Расеі і не зніжаюць яго эфектыўнасці".

"Заявы пра тое, што размяшчэнне гэтага радара і 10 супрацьракет патрабуе нейкіх стратэгічных контрзахадаў з боку Расеі або любой іншай дзяржавы, якая валодае значным ядзерным арсеналам, папросту з`яўляюцца няпраўдай", – сцвярджаў амерыканскі дыпламат. Ён адзначыў, што не можа судзіць, якія дзеянні Масква распачне ў адказ на з`яўленне аб`ектаў сістэмы ПРА ЗША ў Еўропе. Пры гэтым Кейсі выказаў упэўненасць у тым, што магчымыя будучыя крокі Расеі не прывядуць да "фундаментальнай змены ўжо наяўнага стратэгічнага балансу сіл".