«Газпром» рыхтуе падвышэнне цэнаў на газ для СНД і краін Балтыі :: Хартыя'97 :: Навiны

"Газпром" пачынае традыцыйную перамоўную кампанію па падвышэнні з новага года цэнаў на газ для СНД і краін Балтыі. Літве ўжо прапанаванае плаціць на 40% больш, чым цяпер. У верасні пачнецца абмеркаванне цэнаў з Латвіяй і Эстоніяй, у кастрычніку – з Украінай, у лістападзе – з Беларуссю. У выпадку поспеху "Газпром" здолее павялічыць сваю выручку на гэтых рынках на 15–40%. Але ў апошнія два гады газавай манаполіі не атрымлівалася завяршыць гэтыя перамовы без сур`ёзных канфліктаў, якія пагражалі зрывам паставак у Еўропу.

Учора літоўская газета Lietuvos rytas са спасылкай на дадзеныя кампаній-імпарцёраў Lietuvos dujos і Dujotekana паведаміла, што "Газпром" накіраваў апавяшчэнне пра падвышэнне цэнаў на газ для краіны ў 2008 годзе на 40%. "Цэны могуць скласці каля 280 дал. за тысячу кубаметраў", – паведамляе газета. Цяпер газ у Літву пастаўляецца па 190-200 дал. Прэс-сакратар Lietuvos dujos Сігіта Петрыконітэ-Юркунене сказала, што канчатковая цана на будучы год павінна быць узгодненая не пазней за 31 кастрычніка.

Літва стала першай з краін былога СССР, якой "Газпром" накіраваў прапановы па павелічэнні цэнаў на газ у 2008 годзе. Крыніца ў "Газпроме" запэўніла, што "Прыбалтыцы, Беларусі і Украіне цэны насамрэч падвысяць". Іх абмеркаванне з Латвіяй і Эстоніяй пачнецца "неўзабаве". З Беларуссю гэта адбудзецца не раней за кастрычнік. Перамовы на Украіне (цяпер плаціць 130 даляраў за тысячу кубаметраў) "Газпром" зможа пачаць толькі пасля таго, як зафіксуе закупныя цэны на газ у Сярэдняй Азіі.

Па словах мэнэджэра "Газпрома", для Літвы, Латвіі і Эстоніі будуць усталяваныя "нармальныя еўрапейскія цэны", адзіныя для гэтага рэгіёна. Дагэтуль "Газпром" стрымліваў цэны ў Прыбалтыцы, з улікам трохгадовага пераходнага перыяду, фармальна абгрунтаванага ўваходжаннем трох краін у Еўразвяз. Сёлета цэны для Латвіі і Эстоніі складаюць 210–220 дал. за тысячу кубаметраў.

Калі "Газпрому" атрымаецца зафіксаваць цэны, якія абмяркоўваюцца цяпер у экспартных кантрактах на 2008 год, выручка манаполіі на рынках Балтыі, Украіны і Беларусі вырасце з 10,5 млрд дал. да 12–14,7 млрд дал. Аднак палітыка "Газпрома" па рэзкім росце цэнаў на газ можа прымусіць спажыўцоў шукаць альтэрнатыўных пастаўшчыкоў або іншыя крыніцы энергіі, паведамляе «КоммерсантЪ».