Беларускія службоўцы шкадуюць аб вывадзе расейскай ядзернай зброі :: Хартыя'97 :: Навiны

Беларусь, нягледзячы на тое, што вывела з сваёй тэрыторыі ядзерную зброю, увесь час адчувае на сабе ціск, заявіў на паседжанні круглага стала «Славянская літаратура і выклікі сучаснасці» старшыня камісіі па міжнародных справах і нацыянальнай бяспецы «савета рэспублікі» «нацыянальнага сходу» Мікалай Чаргінец.

"Усё было выведзенае, але наўзамен краіна атрымала ціск", – сказаў М.Чаргінец. Па яго словах, "Беларусь без усякіх умоў вывела з сваёй тэрыторыі ядзерную зброю, не атрымаўшы за гэта ні цэнта. Было выведзенае столькі зброі, якая магла б паразіць каля 1,5 тысячы стратэгічных цэляў".

Пры гэтым ён дадаў, што "Беларусь увесь час адчувае на сабе ціск, як краіна, якая адстойвае ідэю славянскага адзінства, а таксама як краіна, якая дэманструе ідэю брацтва з Расеяй".

Напярэдадні амбасадар Расеі ў Беларусі Аляксандр Сурыкаў не выключыў размяшчэння ў Беларусі новых расейскіх вайсковых аб`ектаў у адказ на размяшчэнне элементаў амерыканскай сістэмы ПРА ў Еўропе. "Гэта залежыць ад узроўню нашай палітычнай інтэграцыі. А таксама ад пунктаў гледжання экспертаў, дыпламатаў, вайскоўцаў: трэба, можна, калі, як", – сказаў А.Сурыкаў "Інтэрфаксу".

"Я маю на ўвазе аб`екты, якія маюць дачыненне да ядзернай зброі", – дадаў дыпламат.