Беларускія службоўцы едуць у Еўразвяз :: Хартыя'97 :: Навiны

Намеснік міністра замежных спраў Беларусі Валеры Варанецкі будзе прадстаўляць Беларусь на міжнароднай канферэнцыі "Сумесныя дзеянні – умацаванне Еўрапейскай палітыкі суседства", якая пройдзе 3 верасня ў Брусэлі, паведамілі "Інтэрфаксу" ў прэс-службе Міністэрства замежных спраў Беларусі.

У МЗС адзначылі, што на дадзенае мерапрыемства запрошаныя вышэйшыя прадстаўнікі Міністэрстваў замежных спраў дзяржаў-сябраў ЕЗ і краін, на якія распаўсюджваецца дзеянне Еўрапейскай палітыкі суседства (Алжыр, Арменія, Азербайджан, Беларусь, Егіпет, Грузія, Ізраіль, Іарданія, Ліван, Лівія, Малдова, Марока, Палесцінская аўтаномія, Сірыя, Туніс, Украіна).

Мэтай канферэнцыі з`яўляецца вывучэнне падыходаў краін, ахопленых Еўрапейскай палітыкай суседства, да далейшага развіцця ўзаемадзеяння ў яе рамках. Падчас дыскусій на канферэнцыі асноўны ўпор плануецца зрабіць на пытаннях умацавання палітыкі суседства, уключна магчымасці лібералізацыі гандлю, перамяшчэння грамадзян, праблематыку змены клімату і энергетычнай бяспекі, дадалі ў прэс-службе МЗС.

Нагадаем, што раней Еўразвяз сфармуляваў 12 умоў супрацоўніцтва з афіцыйным Менскам. Асновай для вядзення перамоў называліся дэмакратычныя рэформы і вызваленне палітычных зняволеных.