Станіслаў Шушкевіч: «Я – каталік» :: Хартыя'97 :: Навiны

Былы старшыня Вярхоўнага Савету Беларусі Станіслаў Шушкевіч абвяргае абвінавачванне Беларускага тэлебачання ў тым, што ён прапагандуе забароненую ў Беларусі "Царкву Аб`яднання" Сан Мен Муна. “Я заяўляю, што ніколі ні ў якія секты не ўваходзіў. Я каталік. Лічу, што каталіцкія святары паводзяць сябе у нашай сітуацыі так, як павінны сябе паводзіць сапраўдные духоўныя лідэры”, – кажа палітык у інтэрв’ю прэс-цэнтру Хартыі’97.

“З Мунам я сапраўды сустракаўся на канферэнцыях, прысвечаных руху аб’яднання Паўночнай і Паўднёвай Карэй. Але ў такіх канферэнцыях удзельнічаюць былыя лідэры Нямеччыны, ЗША, Польшчы, Інданезіі (напрыклад Буш старэйшы, Лех Валэнса), а таксама выкладчыкі беларускіх ВНУ, дэпутаты сённяшняй “палаты прадстаўнікоў” (напрыклад, дэпутат Катляроў), беларускія ветэраны вайны”, – тлумачыць Станіслаў Шушкевіч.

Як паведаміў Станіслаў Шушкевіч, Сан Мун часам спансіруе падобныя міжнародныя канферэнцыі і яму як аднаму са спонсараў прадастаўляюць магчымасць вытупіць перад удзельнікамі з прамовай. “Справа у тым, што канферэнцыі падобнага кшталту арганізуе Паўднёвая Карэя, але іх спансуюць таксама прыватныя структуры, вядомыя карэйскія фірмы, у тым ліку і царква Муна”, – дадае былы старшыня Вярхоўнага савету.