АМАП наладзіў «хапун» каля судоў (Фота) :: Хартыя'97 :: Навiны

Сёння ў Салігорску і Нясвіжы праходзяць суды над актывістамі «Маладога Фронту». Падтрымаць моладзевых актывістаў у абодвух гарадах прыйшлі дзесяткі людзей. Аднак будынкі судоў былі ачэпленыя. Ахоўвалі іх супрацоўнікі палка міліцыі спецыяльнага прызначэння (былы АМАП). Яны ж і затрымлівалі людзей.

У дачыненні паўналетніх актывістаў апазіцыі, затрыманых каля будынка Салігорскага раённага суду, цяпер складаюцца пратаколы аб адміністрацыйным правапарушэнні. Ім ставіцца ў віну парушэнне ч. 1 арт. 23.34 Кодэкса аб адміністрацыйных правапарушэннях Рэспублікі Беларусь (парушэнне парадку арганізацыі або правядзення масавага мерапрыемства або пікетавання). Пра гэта паведаміў адзін з затрыманых Франак Вячорка. Разам з ім у мясцовым РАУС у Салігорску знаходзяцца Алесь Каліта, Зміцер Хведарук і яшчэ некалькі чалавек. Суды над затрыманымі ў райцэнтры могуць прайсці 4 або 5 верасня, выказаў здагадку Ф.Вячорка.

Частка 1 артыкулы 23.34 КаАП абвяшчае: "Парушэнне ўсталяванага парадку арганізацыі або правядзення сходу, мітынгу, вулічнага шэсця, дэманстрацыі, іншага масавага мерапрыемства або пікетавання прадугледжвае папярэджанне, або накладанне штрафу ў памеры да трыццаці базавых велічынь, або адміністрацыйны арышт".

Нагадаем, 15 маладых людзей былі затрыманыя 4 верасня каля будынка Салігорскага раённага суду, дзе сёння праходзіць працэс над Іванам Шылам, які абвінавачваецца ў дзейнасці ад імя незарэгістраванай арганізацыі "Малады Фронт".

Фото "Радыё Свабода"