Мартынаў заняў высокую «пасаду» ў Руху недалучэння :: Хартыя'97 :: Навiны

Рух недалучэння (РН) можа і павінен займаць больш актыўную пазіцыю па пытанні правоў чалавека, лічыць міністр замежных спраў Рэспублікі Беларусь Сяргей Мартынаў. Пра гэта ён заявіў, выступаючы 3 верасня ў Тэгеране (Іран) на міністэрскай сустрэчы Руху недалучэння па правах чалавека і культурнай разнастайнасці. Як паведамляе БелаПАН са спасылкай на прэс-службу беларускага МЗС, дадзенае мерапрыемства з`яўляецца першай у гісторыі канферэнцыяй РН, створанай для абмеркавання пытанняў правоў чалавека.

Кіраўнік беларускага знешнепалітычнага ведамства адзначыў, што правы чалавека не менш блізкія краінам – сябрам РН, чым іншым дзяржавам, і пазіцыі краін-сябраў арганізацыі ў гэтым пытанні не менш моцныя, чым у іншых дзяржаў. Рух павінен стаць важным фактарам у разглядзе тэмы правоў чалавека і кансалідаваць сваю пазіцыю ў гэтым пытанні, заявіў С.Мартынаў.

Беларускі міністр таксама падзякаваў краіны – сябры РН за падтрымку ініцыятывы кіраўніка Беларусі аб прызнанні разнастайнасці шляхоў развіцця і за падтрымку рэзалюцыі "Заахвочванне раўнапраўнага і ўзаемапаважлівага дыялогу па правах чалавека", высунутай Беларуссю на 61-ай сесіі Генеральнай асамблеі ААН.

Кіраўнік МЗС Беларусі абраны намеснікам старшыні міністэрскай сустрэчы. У рамках канферэнцыі адбылася яго сустрэча з старшынёй Руху недалучэння міністрам замежных спраў Рэспублікі Куба Феліпэ Перэсам Роке, падчас якой абмеркаваныя магчымасці далейшага ўзаемадзеяння па ўмацаванні ролі РН, актыўнага пасоўвання вынікаў канферэнцыі, а таксама пытанні беларуска-кубінскага супрацоўніцтва ў розных сферах, паведамляе прэс-служба.

Міністэрская сустрэча завершыцца 4 верасня.