У 2008 годзе Беларусь чакае татальнае падаражанне? :: Хартыя'97 :: Навiны

Гаворка ідзе пра падвышэнне падатку на дададзены кошт на 2%. Калі цяпер ад канчатковай цаны тавару або паслугі ў бюджэт сыходзіць 18%, то з 1 студзеня гэтая лічба можа вырасці да 20%. ПДВ "хаваецца" ў любой цане – ад булкі хлеба да хвіліны гутаркі па мабільным тэлефоне.

Пра павелічэнне гэтага падатку службоўцы падумваюць даўно. Тым больш што стаўка ў 20% у нас дзейнічала да 2004 года. Потым мы знізілі яе па прыкладзе Расеі. І вось цяпер зноў збіраемся падняць. Уся справа ў тым, што ў 2008 годзе будуць паніжаныя адваротныя падаткі для прадпрыемстваў (адлічэнні пры куплі сыравіны або камплектуючых). Міністр эканомікі Мікалай Зайчанка лічыць, што для прадпрыемстваў гэта стане "выгодай". А ў што ж гэта выльецца для спажыўцоў?

– Натуральна, што ў гэтым выпадку павялічыцца падатковая нагрузка на людзей. Калі стаўка падатку павялічыцца на 2%, значыць, і цану тавару паднімуць на столькі ж. Бо насамрэч падаткі плацяць не заводы, а пакупнікі, – растлумачыў “КП в Беларуси” эканаміст Леанід Заіка. – ПДВ – гэта самы галоўны падатак, які фармуе значную частку бюджэту. Падвышэнне яго звязанае з праблемай паступлення грошай у бюджэт.

Вядома, 2% – гэта не занадта значная сума. Напрыклад, калі ў краме за кілаграм "Доктарскай" вы плаціце 10 500 рублёў, то 1890 рублёў з гэтай сумы дзяржава забірае ў выглядзе ПДВ. Калі падатак павялічыцца на 2%, то дзяржава атрымае ўжо 2100 рублёў. А сама каўбаса будзе каштаваць 10 710.

І так патроху на кожным тавары! Павялічыцца цэннік і на тое, што прывозяць да нас з-за межы. Бо ПДВ, які плацяць пастаўшчыкі пры ўвозе тавару, таксама ўключаецца ў яго канчатковую цану.