Леанід Заіка: «Наменклатура па законах сацыялізму жыць не хоча» :: Хартыя'97 :: Навiны

У Беларусі разглядаецца праект узбуйнення вядучага піваварнага прадпрыемства Беларусі ААТ «Крыніца». Пра гэта паведаміла агенцтву ПРАЙМ-ТАСС крыніца, блізкая да ўрада. Узбуйненне, па словах крыніцы, дазволіць супрацьстаяць канкурэнтам. Дадзены факт пагадзіўся пракаментаваць прэс-цэнтру Хартыі’97 эканаміст, кіраўнік аналітычнага цэнтра «Стратэгія» Леанід Заіка.

«Урад стварае холдынг, пераходзячы ад кіравання дзяржпрадпрыемствамі на міністэрскім узроўні да кіравання на ўзроўні канцэрнаў. Змяняецца толькі тое, што цяпер прадпрыемствы не будуць падпарадкоўвацца ўраду кожнае ў асобнасці, а імі будуць кіраваць як адзінай кампаніяй», – тлумачыць эканаміст.

Гэтыя ініцыятывы ўрада, на думку эксперта, сведчаць пра ўзмацненне дзяржаўнай манаполіі ў беларускай эканоміцы. Буйны холдынг атрымлівае пэўныя канкурэнтныя перавагі. Ён можа больш эфектыўна праводзіць рэкламную кампанію, канцэнтраваць рэсурсы для ажыццяўлення пэўных праектаў. Холдынгу лягчэй будзе выбіваць для сябе пэўныя ільготы, прэферэнцыі ад урада.

Але ёсць і яшчэ адзін аспект узбуйнення. «Стварэнне холдынгу можа прадстаўляць сабою спробу наменклатуры забяспечыць свае матэрыяльныя інтарэсы ў будучыні. Магчыма, такім чынам, ідзе падрыхтоўка да пераразмеркавання дзяржаўнай уласнасці паміж вышэйшымі службоўцамі. Наменклатура па законах сацыялізму жыць не хоча. Яна рыхтуецца да перамен, імкнецца не выпусціць свой шанец, каб быць гатовай да таго моманту, калі ў нас пачнецца маштабная прыватызацыя. Як я ўжо казаў, ідзе перадпрадажная падрыхтоўка Беларусі», – адзначае Леанід Заіка.