Як зарабляе грошы БРСМ? :: Хартыя'97 :: Навiны

Грамадскае аб`яднанне "Беларускі рэспубліканскі саюз моладзі" (БРСМ) плануе па выніках дзейнасці сёлета атрымаць прыбытак 600–700 млн. рублёў. Пра гэта на прэс-канферэнцыі 4 верасня ў Менску паведаміў першы сакратар Цэнтральнага камітэта БРСМ Леанід Кавалёў.

Гаворачы пра вынікі пяцігадовай дзейнасці арганізацыі, ён адзначыў, што на сёння задача выхаду на самафінансаванне – адна з першачарговых. Па словах Л.Кавалёва, БРСМ рэалізуе шэраг праектаў, якія сёлета пачалі прыносіць прыбытак.

У якасці прыкладу ён прывёў радыёстанцыю "Пілот", прыбытак якой летась склаў 110-120 млн. рублёў. Дзяржава ж, па яго словах, выдзяляе на падтрымку радыёстанцыі 350 млн. рублёў. "Гэтыя сродкі – кропля ў моры ў параўнанні з тым, што атрымоўвае "Русское радио", радыё "Биэй" і інш.", – адзначыў ён. "Разам з тым, мы умудраемся ісці наперад і пашыраць дыяпазон вяшчання: у снежні мінулага года радыёстанцыя з`явілася ў Берасці, у чэрвені – у Магілёўскай вобласці, у кастрычніку плануе пачаць працу ў Віцебскай вобласці", – паведаміў Л.Кавалёў.

Што тычыцца турыстычнай кампаніі БРСМ "Беларускі спадарожнік", то, па словах Л.Кавалёва, у 2005 годзе яе паслугамі скарысталіся 1,5 тысячы турыстаў, а "да канца 2007 года гэтая лічба перавысіць планку ў 5 тысяч". "Абарачэнне кампаніі вырасла ў дзесяткі разоў", – дадаў ён.

Моладзевая латарэя "Юнацкасць", па словах Л.Кавалёва, "дагэтуль знаходзіцца на старце", бо па заканадаўстве праводзіць латарэі ў краіне могуць толькі дзяржаўныя прадпрыемствы. "Цяпер мы знаходзім разуменне ў асобе дзяржавы і спадзяемся, што ў самыя блізкія месяцы пытанне будзе вырашанае", – паведаміў кіраўнік БРСМ.

Як зазначыў Л.Кавалёў, укладанне ў самаакупнасць арганізацыі павінна занесці і будатрадаўскі рух. Паводле яго слоў, БРСМ вярнуўся да той схемы, якая была ў камсамоле, – удзельнікі руху плацяць узносы, "сувымерныя з заробкам маладых людзей".

Па словах Л.Кавалёва, прыбытак БРСМ будзе накіраваны на развіццё прадпрыемстваў арганізацыі.