Міхаіл Залескі: «Збліжэнне з Эўропай – цалкам натуральны працэс для Беларусі» :: Хартыя'97 :: Навiны

Намеснік міністра замежных спраў Валеры Варанецкі падчас выступу ў Бруселі заявіў, што Беларусь гатовая да супрацоўніцтва з ЭЗ і адкрытая для еўрапейскіх інвестыцый у энергетыку, нафтаперапрацоўку, хімічную прамысловасць. Заяву чыноўніка пагадзіўся пракаментаваць прэс-цэнтру Хартыя’97 эканаміст Міхаіл Залескі.

“У нас дамінуе палітыка прыстасаванства. Спачатку білі келіхі ў Крамлі за вечнае сяброўства, цяпер, калі адносіны сапсаваліся, мы тулімся да Эўропы, шукаючы паратунку. Зараз кіраўніцтвам Беларусі ідзе ліхаманкавы пошук выйсця са складанага эканамічнага становішча, у якое сённяшняя ўлада загнала краіну”, – лічыць эканаміст.

На думку эксперта, збліжэнне з Еўропай аб’ектыўна трэба было пачаць гадоу 20 таму. “Зараз у свеце праясняецца пытанне: дзе мяжа сапраўднай Еўропы? Я лічу аддаленне ад Расеі і збліжэнне з Еўропай цалкам натуральным працэсам для Беларусі”, – кажа Залескі.

“Заява Варанецкага пра тое, што мы адкрываем стратэгічныя сферы нашай эканомікі для замежных інвестараў узгоднена з кіраўніком краіны. Такія заявы проста так не робяцца. Продаж нашых актываў ужо пачынаецца, але гэта робіцца неяк не па-людску. Гэта павінна рабіцца арганізавана, публічна, празрыста, з прыцягненнем незалежных экспертаў. Пакуль у нас усё інакш”, – адзначае Міхаіл Залескі.