Туркменскі газ замест расейскага? :: Хартыя'97 :: Навiны

Беларусь вядзе перамовы з Туркменістанам наконт магчымасці ў сярэднетэрміновай перспектыве паставак у краіну туркменскага прыроднага газу, паведаміў у чацвер на прэс-канферэнцыі ў Менску намеснік старшыні прэзідыума Нацыянальнай акадэміі навук Беларусі Уладзімір Цімашпольскі, перадае «Інтэрфакс».

"Цяпер вядуцца перамовы з Туркменіяй, каб у перспектыве праз сістэму ўзаемазалікаў мы маглі мець у сябе прыродны газ", – сказаў У.Цімашпольскі.

Ён адзначыў, што пытанні дыверсіфікавання паставак энерганосьбітаў закладзеныя ў абноўленую канцэпцыю энергабяспекі і энерганезалежнасці Беларусі, якая падпісаная прэм`ер-міністрам і знаходзіцца на разглядзе ў кіраўніка дзяржавы.

Перамовы з Туркменістанам вядуцца ў рамках працы Беларусі па дыверсіфікаванні паставак энерганосьбітаў у рэспубліку.

У.Цімашпольскі паведаміў, што ў праект-канцэпцыю закладзеныя такія кірункі, як падпісанне пагаднення з Азербайджанам аб вылучэнні рэспубліцы квоты на здабычу азербайджанскай нафты і сумесны праект па газаправодных сістэмах. "Вырашаюцца пытанні па сумеснай распрацоўцы іранскага газу, вызначаныя венесуэльскія праекты", –дадаў У.Цімашпольскі. Паводле яго слоў, праект-канцэпцыя таксама прадугледжвае ўвядзенне ў паліўна-энергетычны баланс да 2011 года 3 млн тон умоўнага паліва за кошт выкарыстання высокакаларыйных вуглёў. У якасці пастаўшчыкоў вуголля Беларусь разглядае Расею, Польшчу, Украіну, Нямеччыну.