У верасьні адчуем пераход на поўную аплату расейскага газу :: Хартыя'97 :: Навiны

У Беларусі працягваецца рост цэнаў. Ад 3 верасьня на 7% падвышаныя тарыфы на паслугі электрасувязі. Урад не хавае, што да канца году рост цэнаў будзе працягвацца. Аднак сацыяльнага выбуху ў зьвязку з гэтым эканамісты не прагназуюць, паколькі ўлады абралі тактыку паступовага падвышэньня цэнаў.

Ад пачатку верасьня падаражэлі тэлефонныя размовы, павялічылася абанэнцкая плата за карыстаньне тэлефонам і радыёкропкай — усё ў сярэднім на 7%, паведамляе «Радыё Свабода».

Павелічэньне тарыфаў на паслугі электрасувязі прагназавалася. Яшчэ пры канцы жніўня намесьнік міністра эканомікі Ўладзімер Адашкевіч заявіў, што неўзабаве беларусаў чакае падвышэньне цэнаў практычна на ўсе харчовыя і нехарчовыя тавары.

Празь некалькі дзён пасьля гэтай заявы, 30 жніўня, падаражэў грамадзкі транспарт.

Кошт праезду ў Менску павялічыўся на 20% (ад 500 да 600 рублёў), у рэгіёнах праезд замест ранейшых 420 рублёў стаў каштаваць паўтысячы рублёў за паездку. Пры гэтым улады плянуюць яшчэ і адмяніць ільготны праезд у транспарце для большасьці катэгорыяў грамадзянаў.

Рост цэнаў зьвязаны з новымі рэаліямі ў гандлёвых дачыненьнях з Расеяй, кажа доктар эканамічных навук Барыс Жаліба.

“Павелічэньне цэнаў на расейскія газ і нафту адбіваецца на росьце сабекошту ў вытворцаў, даслоўна ўсіх — адных больш, другіх менш, але ўсіх. Пераход на поўную аплату, у прыватнасьці, расейскага газу, пачынаючы зь верасьня, мы адчуваем у росьце цэнаў на транспарт і на аплату жыльлёва-камунальных паслугаў”, — кажа Барыс Жаліба.