Леанід Заіка: Іранскі праект не мае нічога агульнага з дзяржаўнымі інтарэсамі :: Хартыя'97 :: Навiны

Беларусь падпісала з уладамі Ірана пагадненне аб здабычы нафты на поўдні краіны. Плануецца, што праз два гады ў рамках праекту, які ацэньваецца ў 450 мільёнаў даляраў, будзе штодня здабывацца 40 тысяч барэляў нафты. Падпісанне дадзенага пагаднення каментуе прэс-цэнтру Хартыі’97 эканаміст, кіраўнік аналітычнага цэнтра «Стратэгія» Леанід Заіка.

На думку эканаміста, калі б Беларусь пабудавала з Расеяй нармальныя стасункі, адмысловага сэнсу ў ажыццяўленні гэтага праекту не было б. Беларуская наменклатура звыкла добра зарабляць на таннай расейскай нафце і не мае намеру ад гэтага адмаўляцца. «Беларусь прадае за мяжу нафтапрадуктаў прыблізна на 6 мільярдаў даляраў у год, прычым на бензін, які прадаецца ў ЗША, усталёўваецца цана ў 45 цэнтаў за літр, тады як сваім спажыўцам аўтамабільнае паліва абыходзіцца больш як за даляр за літр», – паведаміў эканаміст.

«Нафтапрадукты зрабілі нашу наменклатуру сквапнай. Грошы, якія збіраюцца ўкласці ў іранскі праект можна было б з большым толкам выдаткаваць у Беларусі на вытворчасць высокатэхналагічных тавараў, эфектыўную арганізацыю працы парку высокіх тэхналогій. Бо іранская нафта не будзе транспартавацца ў Беларусь, бо гэта эканамічна не апраўданае. Яна будзе прадавацца на месцы здабычы, але хто будзе пры гэтым сачыць за фінансавай чысцінёй пагадненняў?», – задае рытарычнае пытанне эксперт.

Ясных перспектыў эфектыўнасці дадзенага праекту не назіраецца. «Ніхто не можа паручыцца, што іранцы, пасля сумеснай з беларусамі арганізацыі нафтаздабычы, будуць прадаваць нам танную нафту. Не ўлічваецца таксама абвастрэнне стасункаў Ірана і ЗША. Гэта можа прывесці да таго, што нам застанецца толькі глядзець, як у літаральным сэнсе гараць нашы інвестыцыі пасля амерыканскага бамбавання», – папярэджвае эканаміст.

Беларуская наменклатура, як лічыць аналітык, мае намер працягваць узбагачацца за грошы падаткаплацельшчыкаў. «Пах нафты прыцягвае драпежнікаў ад наменклатуры. Яе дзеянні часцяком не маюць нічога агульнага з дзяржаўнымі інтарэсамі», – падагульняе Леанід Заіка.