На Дзень горада ў Менск прыедуць дэлегацыі з Абу-Дабі, Астаны і Пекіна :: Хартыя'97 :: Навiны

У Менск на святкаванне Дня горада пачалі прыбываць прадстаўнікі замежных дэлегацый. У Менск прыязджаюць дэлегацыі з Абу-Дабі, Маската, Астаны, Берліна, Анкары, Пекіна, Дэлі, Вены, Вільні, Лодзі, Калінінграда, Масквы, Рыгі, а таксама рэгіёнаў Беларусі. Акрамя таго, у сталіцу прыбудуць камандзіры вялікага дэсантнага карабля "Менск", памежнага вартавога карабля "Менск" і ракетнага крэйсера "Маршал Усцінаў". Улічваючы статус госцяў, яны будуць расселеныя ў гасцініцах "Еўропа" і "Вікторыя".

Паводле праграмы знаходжання, госці беларускай сталіцы возьмуць удзел у цырымоніі ўрачыстага адкрыцця свята "Менск – жыцця майго крыніца". Таксама прадстаўнікі дэлегацый пабываюць на іншых святочных мерапрыемствах – выставе дасягненняў народнай гаспадаркі прамысловых прадпрыемстваў Менска, свяце-прэзентацыі Нацыянальнай школы прыгажосці "Краса беларускай сталіцы", свяце спорту і здароўя "Табе, наш горад, прысвечаны!", свяце сярэднявечнай культуры "Легенды старога Менска", выставе народных рамёстваў "Горад майстроў", кірмашу мёду "Мядовы спас" і шматлікіх іншых.

Акрамя таго, замежныя госці наведаюць музеі сталіцы і здзейсняць экскурсію па маршруце Менск – Беларускі дзяржаўны музей народнай архітэктуры і побыту ў Строчыцах – Мірскі замак – Нясвіжскі палацава-паркавы ансамбль.