«Ленинский клич» пакрыўдзіўся на «Вольны горад» :: Хартыя'97 :: Навiны

Рэдактара крычаўскай недзяржаўнай маланакладнай газеты “Вольны горад” Сяргея Няроўнага 5 верасня выклікалі ў міліцыю. Прычынай выкліку сталі скаргі на яго выданне галоўнай рэдактаркі дзяржаўнай раённай газеты “Ленинский клич” Таццяны Іўкінай. У заявах, накіраваных у Крычаўскі РАУС кіраўніцай “раёнкі”, паведамляецца, што “ВГ” у шэрагу артыкулаў абразіў яе гонар і годнасць і ўмяшаўся ў асабістае жыццё.

Спадарыня Іўкіна звярталася ў міліцыю з заявамі двойчы – 6 і 28 чэрвеня гэтага года. Як паведаміў Сяргей Няроўны прэс-службе БАЖ, нагодай для першай скаргі стала нататка “Устал и проболтался”, апублікаваная ў “Вольным горадзе” на пачатку чэрвеня. У гумарыстычнай форме ў ёй распавядалася пра тое, як супрацоўнік “Ленинского клича” аднойчы ў кампаніі прагаварыўся, што крытычныя артыкулы пра апазіцыю ў іх газеце піша сама галоўная рэдактарка.

У наступнай скарзе Т.Іўкіна спасылалася ўжо на матэрыялы, надрукаваныя ў “ВГ” у перыяд з 2004 па 2007 год.

Як даведаўся з размовы з участковым міліцыянтам Юрыям Барэйшам Сяргей Няроўны, копіі гэтых матэрыялаў былі накіраваныя на экспертызу ў Мінск. 30 жніўня міліцыянты атрымалі адказ эксперта, кандыдата філалагічных навук Шчарбаковай, у якім паведамлялася, што ў згаданых артыкулах знявагаў няма.

Па словах Ю.Барэйшы, міліцыя прыме рашэнне аб перадачы справы ў суд у бліжэйшы час.