АНДРЭЯ КЛІМАВА ПРЫСУДЗІЛІ ДА ДВУХ ГАДОЎ КАЛОНІІ НА ФАКТЫЧНА ЗАКРЫТЫМ ПРАЦЭСЕ :: Хартыя'97 :: Навiны

Аднаго з лідэраў беларускай апазіцыі Андрэя Клімава прысудзілі на фактычна закрытым працэсе ў Цэнтральным судзе Менска да двух гадоў пазбаўлення свабоды. Пра гэта прэс-цэнтру Хартыі’97 паведаміў журналіст Алег Грузділовіч, які даведаўся пра прысуд палітыку. Інфармацыю пра суд над Клімавым журналісту пацвердзілі ў Пракуратуры Менска і Цэнтральным судзе сталіцы. Працэс над палітыкам пачаўся 30 ліпеня і скончыўся ўжо праз два дні, 1 жніўня. Прысуд вынесла суддзя Алена Ілліна.

Невядома, ці прызнаў Андрэй Клімаў сваю віну. Невядома таксама, які рэжым у калоніі, у якой будзе адбываць пакаранне палітык. Вядома толькі, што ў якасці грамадскага абаронцы на працэсе павінна была прысутнічаць жонка Клімава – Таццяна Леановіч-Клімава.

Па непацверджаным звесткам, прысуд палітыку абскарджаны ў Менскім гарадскім судзе.

Апазіцыйны лідэр, дэпутат Вярхоўнага Савета 13 склікання Андрэй Клімаў быў арыштаваны 3 красавіка 2007 года за апублікаваныя ў Інтэрнэце публіцыстычныя артыкулы. Супраць палітыка ўзбуджаная крымінальная справа па артыкуле 361 ч.3 КК РБ "Заклікі да звяржэння або змянення канстытуцыйнага ладу, ажыццёўленыя з дапамогай СМІ". Андрэй Клімаў утрымліваецца ў СІЗА №1 г. Менска. У ізалятары ў палітыка здарыўся сардэчны прыступ.

Раней Клімаў, актыўны апанент Аляксандра Лукашэнкі, правёў 4 гады ў турме па абвінавачваннях у эканамічных злачынствах, а таксама быў прысуджаны да 15 месяцаў абмежавання свабоды ("хіміі") за арганізацыю вулічных акцый пратэсту на Дзень Волі ў 2005-м годзе. "Міжнародная Амністыя" прызнала Андрэя Клімава Вязнем сумлення.