Прадпрымальнікі будуць мітынгаваць на Бангалор :: Хартыя'97 :: Навiны

Менгарвыканкам дазволіў прадпрымальнікам правядзенне 10 верасня мітынгу ў сталічным парку Дружбы народаў. Заяўку на яго правядзенне 24 ліпеня падалі 12 актывістаў рэспубліканскага грамадскага аб`яднання прадпрымальнікаў "Перспектыва", у тым ліку старшыні некалькіх саветаў прадпрымальнікаў рынкаў з Менска, Гомеля, Віцебска і іншых гарадоў рэспублікі.

Як заявіў БелаПАН старшыня РГА "Перспектыва" Анатоль Шумчанка, мэта мітынгу – звярнуць увагу ўлад на праблемы індывідуальных прадпрымальнікаў і асоб, якія працуюць па найманні. У сваёй заяве прадпрымальнікі звяртаюць увагу службоўцаў на неабходнасць кіравацца рэкамендацыямі кіраўніка дзяржавы, выказанымі ім на Усебеларускім народным сходзе ў 2006 годзе. У ім прэзідэнт заклікаў Савет міністраў і іншыя органы дзяржаўнай улады не пагаршаць умовы працы індывідуальных прадпрымальнікаў і ствараць стабільныя падатковыя ўмовы для развіцця малога бізнэсу.

Галоўныя праблемы прадпрымальнікаў сёння, адзначыў А.Шумчанка, звязаныя з дзеяннем указаў прэзідэнта №№ 760 і 302. Паводле ўказу № 760, з 1 студзеня 2008 года індывідуальныя прадпрымальнікі (ІП) не могуць прыцягваць наёмных працаўнікоў за выключэннем членаў сям`і і блізкіх сваякоў. Пры гэтым застаецца ў сіле абмежаванне колькасці працаўнікоў у ІП да трох чалавек.

"Мы не маем намеру змагацца супраць так званых ЧУПаў (прыватных унітарных прадпрыемстваў) і ўказу № 302. Калі ў кагосьці ёсць жаданне перайсці з індывідуальных прадпрымальнікаў у ЧУПы – гэта іх права. Але ў прадпрымальнікаў таксама павінна быць права выбару. Мы патрабуем вярнуць заканадаўчую норму, якая дазваляе наймаць на працу трох чалавек з грамадзян Рэспублікі Беларусь, не абмяжоўваючы гэтае кола толькі членамі сям`і і блізкімі сваякамі", – падкрэсліў А.Шумчанка.

"Дагэтуль кіраўніка дзяржавы пераконвалі службоўцы. Дазволіўшы мітынг, улады проста далі магчымасць сказаць сваё слова. Цяпер шмат будзе залежаць ад таго, наколькі пераканаўча і магутна прагучаць патрабаванні прадпрымальнікаў аб нармальных умовах працы", – падкрэсліў Шумчанка.