Андрэя Клімава пакаралі строгім рэжымам :: Хартыя'97 :: Навiны

1 жніўня Цэнтральны раённы суд Менска пакараў былога дэпутата і прадпрымальніка Андрэя Клімава двума гадамі зьняволеньня паводле абвінавачаньня ў закліках супраць дзейнай ўлады. Аднак шмат падрабязнасьцяў пра працэс над апазыцыянэрам і прысуд яму яшчэ застаюцца нявысьветленымі.

10-га верасьня адвакат Валянціна Лятун паведаміла «Радыё Свабода», што працэс над Андрэем Клімавым быў закрытым. Адвакатка сказала, што “не памятае”, які рэжым ўтрыманьня прызначаны Андрэю Клімаву, і адмовілася адказваць на далейшыя пытаньні, спаслаўшыся на дамову з жонкай Клімава Тацянай Леановіч. Сама Тацяна Леановіч на тэлефанаваньні не адказвае.

Зьвесткі пра рэжым ўтрыманьня для Андрэя Клімава ўдалося ўдакладніць ў Цэнтральным судзе Менска. Там паведамілі, што былы дэпутат пакараны на два гады строгага рэжыму.

Былы адвакат Ігар Рынкевіч патлумачыў: “Строгі рэжым – трэці па жорсткасьці з чатырох, якія існуюць ў Беларусі. У параўнаньні з ўзмоцненым рэжымам вязьню дазволена ў год меней на адну перадачу, на адно спатканьне і менш грошай можна патраціць ў турэмнай краме. Але галоўнае, што строгі рэжым даецца рэцыдывістам, якія раней зрабілі сур’ёзныя злачынствы.

Адпаведна больш строгая ахова і больш жорсткія адносіны як да вязьня з боку адміністрацыі, гэтак і сярод вязьняў. Такое строгае пакараньне апазыцыянэру – ўпершыню ў Беларусі”.

Прысуд Андрэю Клімаву яшчэ не набыў законнай сілы. Паводле зьвестак з Менскага гарадзкога суду, абарона Клімава накіравала папярэднюю скаргу і пакуль ідзе азнаямленьне з пратаколам працэсу.