У Маскве выносяць прысуд беларусам :: Хартыя'97 :: Навiны

Цвярскі суд Масквы ў панядзелак абвесціць прысуд двум грамадзянам Беларусі, абвінавачваным у кантрабандзе таблетак ад кашлю, у якіх змешчаныя псіхатропныя рэчывы.

Як паведаміў "Інтэрфаксу" адвакат абвінавачваных Яўген Чарнавусаў, падчас спрэчак бакоў пракурор па справе прасіў прысудзіць падсудных да 14 гадоў пазбаўлення свабоды кожнага за пазапраўную пастаўку ў Расею 1 тысячы таблетак ад кашлю.

Аляксандр Чачураў і Сяргей Лагун абвінавачваюцца ў кантрабандзе псіхатропных рэчываў (ч. 2 арт. 188 КК РФ) і пазапраўным збыце псіхатропных рэчываў (ч. 3 арт. 228.1).

Па словах абаронцы, Чачураў і Лагун былі затрыманыя і ўзятыя пад варту 7 сакавіка.
"Супрацоўнік федэральнай службы па Наркакантролю, праз Інтэрнэт замовіў партыю польскіх лекаў туссал. Пры гэтым ён прадставіўся аптэкарам, а Чачураў і Лагун прывезлі таблеткі ў Маскву, у выніку чаго былі затрыманыя", – адзначыў Чарнавусаў.

Па словах адваката, у дзеяннях яго падабаронных няма складу крымінальнага пакарання. "Таблеткі Чачураў і Лагун збывалі не наркаманам, а ў аптэку. Самае большае, што можа быць у іх дзеяннях – гэта парушэнне фармацэўтычнай дзейнасці – адміністрацыйная справа", – сказаў Чарнавусаў. Адвакат адзначыў, што дадзены прэпарат не ўключаны ў пералік зарэгістраваных у Расеі, і змяшчае псіхатропнае рэчыва – декстраметарфан гідрабамід, – у малых дозах.

"У анатацыі да лекавага прэпарата адзначанае, што яго могуць ужываць нават маленькія дзеці", – дадаў Чарнавусаў.