Лукашэнка задумаўся пра бяспеку :: Хартыя'97 :: Навiны

Праект Канцэпцыі энергетычнай бяспекі Беларусі да 2020 года, які ўлічвае рост цэнаў на расейскія энерганосьбіты, падрыхтаваны ў Беларусі. Як паведамілі "Інтэрфаксу" ў прэс-службе кіраўніка дзяржавы, пра асноўныя палажэнні дакумента ў панядзелак Аляксандру Лукашэнку даклалі памочнік Сяргей Ткачоў і старшыня Прэзідыума Нацыянальнай акадэміі навук Міхаіл Мясніковіч.

Праект Канцэпцыі, паводле інфармацыі прэс-службы, "накіраваны на гарантаванне энергетычнай бяспекі краіны, а значыць – эканамічнай, палітычнай і вытворчай бяспекі ў цэлым".

"У праекце ўлічаная сітуацыя, якая склалася на рынку энерганосьбітаў, у тым ліку і ў сувязі з ростам цэнаў на энергарэсурсы, што пастаўляюцца з Расеі", – растлумачылі ў прэс-службе.

Упершыню, адзначылі ў прэс-службе, распрацаваны доўгатэрміновы баланс паліўна-энергетычных рэсурсаў – да 2020 года, на базе якога будуць фармавацца планы далейшага сацыяльна-эканамічнага і інавацыйнага развіцця рэспублікі, а таксама розныя дзяржаўныя праграмы. Праект Канцэпцыі прадугледжвае 12 так званых парогавых значэнняў – паказчыкаў, ад захавання якіх будзе залежаць энергабяспека краіны. Уводзіцца спецыяльны паказчык энергаёмістасці прадукцыі, тавараў і паслуг, якія вырабляюцца галінамі і асобнымі прадпрыемствамі. Будзе рабіцца акцэнт на выкарыстанне выключна энергаэфектыўных бытавых прыбораў. Напрыклад, Нацыянальная акадэмія навук разглядае пытанне аб масавым увядзенні святлодыёднай тэхнікі, растлумачылі ў прэс-службе прэзідэнта. Там жа падкрэслілі, што ў рэспубліцы "выбудоўваецца празрыстая "вертыкаль" у сферы энергаспажывання: на ўзроўні краіны вызначаецца баланс і энергаёмістасць ВУП, на ўзроўні міністэрстваў вызначаецца выдатак паліўна-энергетычных рэсурсаў на тую ці іншую адзінку прадукцыі, якая вырабляецца, у грашовым выразе.

Паводле праекту Канцэпцыі, у Беларусі будзе працягнутая праца па дыверсіфікаванні паліўна-энергетычных рэсурсаў, якія выкарыстоўваюцца. "У прыватнасці, плануецца пабудаваць тры вугальныя станцыі магутнасцю каля 800–850 Мвт, якія размесцяцца ў Берасцейскай, Гарадзенскай і Гомельскай абласцях. Акрамя таго, на думку экспертаў, ужо неўзабаве стане адчувальнай рэальная эканамічная выгода ад пераводу беларускіх цэментавых заводаў на выкарыстанне вуголля", – адзначылі ў прэзідэнцкай прэс-службе.

Паводле ацэнцы спецыялістаў, растлумачылі там, ва ўмовах росту цэнаў на мазут і на газ выпрацоўка цеплавой і электрычнай энергіі на вугле будзе ў перспектыве значна выгаднейшай. "Вугаль можна пастаўляць не толькі з Расеі, але і з іншых дзяржаў. Цікавыя прапановы з гэтай нагоды паступаюць з Украіны, Польшчы і іншых краін", – паведамілі ў прэс-службе.

Аляксандр Лукашэнка ў цэлым ухваліў праект Канцэпцыі, паведамілі ў прэс-службе. Дакумент будзе зацверджаны ўказам кіраўніка дзяржавы.

Фота "КоммерсантЪ"