За наведванне «Свабоднага тэатра» выклікаюць у КДБ :: Хартыя'97 :: Навiны

Ужо трох наведвальнікаў спектакля 22 жніўня, затрыманых міліцыяй, выклікалі ва Упраўленне ўнутраных спраў і КДБ, паведаміла дырэктарка “Свабоднага тэатра” Наталля Каляда.

Усе выкліканыя — непаўналетнія навучэнцы мінскіх школаў. Падчас “размоў” іх упэўнілі, што яны не змогуць паступіць у вну Беларусі, а пры паўторным наведванні “Свабоднага тэатра” будуць “адлічаныя са школ”.

Паводле словаў Наталлі Каляды, і ў саміх вну на сходах паведамілі студэнтам і выкладчыкам, што ў выпадку наведвання “Свабоднага тэатра” яны будуць адлічаныя або звольненыя адпаведна.

Тэатральны сезон пачаўся падобным чынам. Як паведаміў акцёр “Свабоднага тэатра” Алег Сідорчык, кіраўніцтва дзяржаўных тэатраў на традыцыйных восеньскіх сходах папярэдзіла акцёраў, што за супрацоўніцтва з “Свабодным тэатрам” яны будуць звольненыя, піша "Наша ніва".