Хутка Менск увойдзе ў шэраг самых дарагіх для пражывання гарадоў :: Хартыя'97 :: Навiны

Да такой высновы прыйшлі эксперты агенцтва эканамічнай інфармацыі ПРАЙМ-ТАСС падчас даследаванняў пакупніцкай здольнасці даляра ЗША у нашай краіне.

Даляр зніжаецца ва ўсім свеце, а ў такіх краінах, як Беларусь, Расея, Украіна і іншых краінах з пераходнай эканомікай, дзе курс і значэнне гэтай валюты першапачаткова былі завышаныя, абясцэненне даляра адбываецца найбольш імкліва.

Аналітыкі агенцтва ПРАЙМ-ТАСС супаставілі рост курсу даляра па дачыненні да беларускага рубля за апошнія пяць гадоў з ростам цэнаў на асноўныя тавары штодзённага спажывання, жыллёва-камунальных тарыфаў, кошты квадратнага метра жылля і прыйшлі да высновы, што ў шматлікіх беларусаў кашалькі за гэты час вельмі моцна "схуднелі".

У Беларусі ў 2002–2007 гады намінальны курс даляра павялічыўся ўсяго на 36%, у той час як спажывецкія цэны за гэты перыяд узраслі больш як у 2,3 разоў. У выніку хуткасць росту цэнаў апярэджвае дынаміку абменнага курсу ў 3,7 разоў. Пры гэтым ужо чацвёрты год даляр зафіксаваны прыкладна на адным узроўні, гэта значыць, не расце, а цэны ў крамах і на рынках, наадварот – увесь час падвышаюцца. Гэта значыць, іншымі словамі, "амерыканец" у Беларусі за гэты час вельмі моцна "схуднеў", а разам з ім – і зарплаты ў даляравым эквіваленце.

Найбольш уражліва выглядаюць разлікі абясцэнення зарплаты да ўзроўню тарыфаў ЖКГ. Тарыфы на жыллёва-камунальныя паслугі ў апошнія гады раслі нашмат хутчэй, чым астатнія цэны. У Беларусі за перыяд з 2002 года яны выраслі прыкладна ў 6,2 разоў, адпаведна, даляр "абясцэніўся" па дачыненні да тарыфаў на жыллёва-камунальныя паслугі ў 4,5 разоў. Атрымліваецца, што прызначаная ў 2001 годзе заработная плата ў памеры 500 даляраў для захавання сваёй пакупніцкай здольнасці па дачыненні да тарыфаў ЖКГ павінна складаць на 1 жніўня 2007 года не менш як 2291 (!) даляр.