Увядзенне рэгістрацыі ўзмоцніць кантроль за зборам падаткаў :: Хартыя'97 :: Навiны

Адмена інстытута прапіскі з 1 студзеня 2008 года не пацягне за сабою ўвядзення ў Беларусі новых пашпартоў, паведаміў на прэс-канферэнцыі ў сераду начальнік кіравання па грамадзянстве і міграцыі ГУУС Менгарвыканкама Мікалай Шэўчык.

"З 1 студзеня ў Беларусі не плануецца ўвядзенне новага віду пашпарта. Адмена інстытута прапіскі і ўвядзенне рэгістрацыі грамадзян не прадугледжвае імгненную адмену пашпарта. Ніякіх новых дакументаў замест пашпарта з пачатку 2008 года ў Беларусі выдаваць не будуць", – растлумачыў М.Шэўчык. Ён сказаў, што "паступова цягам некалькіх гадоў у Беларусі будзе ўведзены так званы ўнутраны і замежны пашпарт". "Увядзенне замежнага пашпарта спросціць жыццё людзям, якім часта прыходзіцца бываць за мяжой, напрыклад, "дальнабойнікамі", – сказаў М.Шэўчык.

Ён таксама не выключыў таго, што "праз некалькі гадоў у Беларусі могуць з`явіцца біяметрычныя пашпарты".

Адказваючы на пытанні журналістаў, М.Шэўчык сказаў, што адмена прапіскі і ўвядзенне рэгістрацыі грамадзян, "гэта не пацягне падаражання жылля, у тым ліку для асоб, якія здымаюць жыллё ўнаймы".

"Сітуацыя складаецца так, што ў Менску сталі больш будаваць жылля, і гэта вызначае яго цану, а не існаванне або адсутнасць прапіскі", – дадаў начальнік кіравання.

Паводле яго слоў, "увядзенне рэгістрацыі таксама дазволіць узмацніць кантроль за зборам падаткаў ад здачы жылля ў арэнду".

Наконт пытанняў, рэгістрацыі студэнтаў у Менску, М.Шэўчык растлумачыў, што "паводле новага ўказу прэзідэнта, калі студэнт, які прыбыў у Менск на вучобу, не мае месца ў інтэрнаце або не знайшоў неабходных 20 квадратных метраў для рэгістрацыі, яго будуць рэгістраваць пры навучальнай установе, у якой ён вучыцца".