Беніта Ферэра-Вальднер: «Спадзяюся, што Беларусь зробіць выбар на карысць Еўропы» :: Хартыя'97 :: Навiны

"Гэта справа Беларусі – самастойна заняцца сваімі праблемамі і дамагчыся прагрэсу. Я шчыра спадзяюся, што Беларусь зробіць свой стратэгічны выбар на карысць Еўропы", – такую заяву зрабіла камісарка Еўразвяза па знешніх сувязях і палітыцы добрасуседства Беніта Ферэра-Вальднер, выступаючы 11 верасня перад камітэтам Еўрапарламента па знешніх сувязях.

Яна падкрэсліла, што Беларусь застаецца краінай, якой ЕЗ "надае адмысловую ўвагу". Пры гэтым Б.Ферэра-Вальднер адзначыла, што яе прадстаўнікі 3 верасня ў Брусэлі падчас міжнароднай канферэнцыі "Працаваць разам – паляпшаць палітыку добрасуседства" правялі сустрэчу з беларускай афіцыйнай дэлегацыяй, паведамляе БелаПАН. "Сустрэча прайшла адкрыта і канструктыўна, – сказала Б.Ферэра-Вальднер. – Мы паслалі пэўны сігнал, што мы хочам бачыць станоўчыя змены ў нашых стасунках і рух да паўнавартаснага партнёрства ў рамках Еўрапейскай палітыкі добрасуседства". Пры гэтым, падкрэсліла яна, паляпшэнне стасункаў магчымае толькі пры "пераканаўчых кроках з боку Беларусі на шляху да дэмакратыі і захавання правоў чалавека". "Мы павінны працягваць настойваць на выконванні гэтых фундаментальных каштоўнасцяў", – заявіла Б.Ферэра-Вальднер.

Паводле яе слоў, увесну гэтага года ў Беларусі назіраліся "некаторыя пазітыўныя змены", аднак нядаўнія арышты грамадскіх актывістаў і канфіскацыя брашур "Што Еўрапейскі Звяз можа даць народу Беларусі" "не ўсяляюць надзею".

Б.Ферэра-Вальднер таксама асоба падкрэсліла, што Еўракамісія па-ранейшаму лічыць неабходным адкрыць сваё прадстаўніцтва ў Менску. Паводле яе слоў, усе звязаныя з гэтым працэдуры "зацягваюцца" беларускім бокам. "На мінулым тыдні мы зноў нагадалі пра гэта пытанне беларускаму боку. Спадзяюся, Беларусь неўзабаве зацвердзіць нашы дамоўленасці", – сказала еўракамісарка.

Стэнаграма выступу Б.Ферэра-Вальднер размешчаная на сайце
Еўракамісіі.