Гайдукевіча «знялі» з пасады спецпрадстаўніка ў Еўропе :: Хартыя'97 :: Навiны

Палітыку паведамілі пра гэта ўчора ўвечары, калі той збіраўся ў службовую камандзіроўку. “Я на гэтай пасадзе больш не працую, у штатах Міністэрства замежных справаў яе ўжо няма. Я ведаў, што так будзе”, -- заявіў палітык.

Напярэдадні “Еўрарадыё” даведалася, што ў чацвер Сяргей Гайдукевіч збіраўся ехаць у Японію ў якасці спецпрадстаўніка ў Еўропе. Але ўжо сёння вядома, што калі ён туды і паедзе, то ўжо ў іншай якасці.

Цікава, што некалькі дзён таму ў інтэрв’ю “БелГазете” палітык заявіў, што з задавальненнем перадаў бы сваю працу Міністэрству замежных справаў:

“Я быў бы вельмі рады гэтаму, вядома, для лідэра партыі, дэпутата праца, якой я займаюся, вельмі важнае іміджавае пытанне. Зняваг на свой адрас прачытаў дастаткова і вельмі ім рады. Значыць, пацэліў у кропку”.

Атрымоўваецца, што ў нейкім сэнсе гэтую падзею можна лічыць адстаўкай па ўласным жаданні. Прынамсі, у наступны раз Гайдукевіч будзе больш асцярожным у сваіх заявах.

Але ж заўважна і іншае. Не ведаем, наколькі эфектыўнай была праца Гайдукевіча як спецпрадстаўніка у Еўропе, аднак як палітык ён выкарыстоўваў сваю пасаду напоўніцу. Пасля адстаўкі спікера “палаты прадстаўнікоў” Уладзіміра Канаплёва менавіта Гайдукевіч заявіў, што хоча балатавацца ў спікеры. На пытанне “Еўрарадыё”, ці магла гэтая заява стаць прычынай адстаўкі, Гайдукевіч рассмяяўся і сказаў: “Без каментароў”.

Тым часам у прэс-службе Міністэрства замежных справаў нам гэтую інфармацыю ні пацвердзілі, ні абверглі, сказаўшы, што правяраюць гэтыя звесткі.