Саўмін і Мінфін віны не прызнаюць :: Хартыя'97 :: Навiны

13 верасня падчас падрыхтоўчай гутаркі па пазове РПГА «Беларускі Хельсінкскі Камітэт» да Савета Міністраў і Міністэрству фінансаў Рэспублікі Беларусь аб пакрыцці страт, прадстаўнікі дзяржаўнай казны выказалі нязгоду з пазовам. Тым не менш яго разгляд адбудзецца ў Вышэйшым Гаспадарчым Судзе Рэспублікі Беларусь праз два тыдні.

У прысутнасці прадстаўнікоў дыпламатычнага корпуса, журналістаў і праваабаронцаў суддзя Кацярына Караткевіч заслухала прадстаўніка Міністэрства фінансаў, які заявіў, што прэзідэнцкі Указ № 460, прыняты ў лістападзе 2003 года, усталяваў парадак вызвалення ад выплаты падаткаў сродкаў, атрыманых у рамках тэхнічнай дапамогі.

У той жа час, БХК настойвае на тым, што да лістапада 2003 г. Рэспубліка Беларусь не выконвала свае абавязальніцтвы па міжнароднай дамове ў рамках супрацоўніцтва Беларусі з саюзам еўрапейскіх супольнасцяў па праграме ТАСІС. Па віне вышэйшых органаў улады сітуацыя з вызваленнем ад выплаты падаткаў не была ўрэгуляваная, з прычыны чаго БХК былі выстаўленыя вялізныя штрафныя санкцыі. Разам з тым, невінаватасць БХК пацвярджаецца спыненнем крымінальнай справы па факце няплаты падаткаў за адсутнасцю складу злачынства.

Прадстаўнікі Савета міністраў на папярэдняе слуханне не з`явіліся, і суд абавязаў адказчыкаў прадставіць пісьмовыя пярэчанні на пазоў.

БХК спадзяецца, што разгляд пазову будзе адкрытым, бесстароннім і справядлівым і дазволіць Рэспубліцы Беларусь працягваць канструктыўнае супрацоўніцтва з Еўрапейскім Звязам.