Акцыі салідарнасьці прайшлі ў Кіеве і Варшаве (Фота) :: Хартыя'97 :: Навiны

Сёньня ў Кіеве і Варшаве адбыліся акцыі салідарнасьці з дэмакратычнымі сіламі Беларусі.

У Кіеве гэтым разам акцыя супала з сёмай гадавінай знікненьня журналіста Георгія Гонгадзе, таму актывісты ініцыятывы "Салідарнасьць" арганізавалі пікет ля беларускай амбасады, пасьля чаго далучылісь да акцыі памяці загіблага журналіста на галоўнае плошчы ўкраінскае сталіцы.

У Варшаве сёньня каля будынку беларускай амбасады ў Варшаве адбыўся пікет салідарнасьці з палітвязьнямі і сем’ямі зьніклых палітыкаў і палітвязьняў.

Каля чатырох дзясяткаў перадусім студэнтаў зь Беларусі, якія вучацца ў польскай сталіцы па праграме імя Каліноўскага, прыйшлі да будынку амбасады зь бел-чырвона-белымі сьцягамі, партрэтамі зьніклых, палітвязьняў, плякатамі з надпісамі «Свабоду палітвязьням”.

Беларусаў падтрымалі палякі. “Нам дапамагалі ў камуністычныя часы іншыя народы. А цяпер, калі ў такой сытуацыі беларусы, мы таксама павінны ім дапамагаць. Каб тыя, хто змагаецца, ведалі, што яны не самотныя” – паведаміў “Радыё Свабода” польскі грамадзскі актывіст Томаш Бладынец.

Удзельнік акцыі наладзілі таксама гэпэнінг, у часе якога некалькі чалавек з чорнымі стужкамі на вачах нібыта глядзелі беларускае тэлебачаньне, якое замест праўдзівай інфармацыі адурманьвала іх “опіюмам для народу”.

Напрыканцы пікету прысутныя запалілі сьвечкі і пакінулі іх каля будынку амбасады.

Варшава