У Салігорскі райвыканкам падалі 100 заявак на пікеты :: Хартыя'97 :: Навiны

У адзін дзень сто заявак на пікеты падалі прадстаўнікі апазыцыйных партый і грамадзянскія актывісты Салігорску. Яны плянуюць 30 верасьня правесьці ў горадзе шматлікія пікеты.

Пяцьдзесят заявак пададзена на пікеты супраць сацыяльнай палітыкі ўлад, адмены палёгак і гарантый, астатнія плянуецца арганізаваць для збору подпісаў пад патрабаваньнем вызваліць палітычных зьняволеных: Мікалая Аўтуховіча, Зьміцера Дашкевіча, Артура Фінькевича, Антона Кішкурно, Андрэя Клімава, Аляксандра Казуліна. Праўда, усё гэта адбудзецца, калі мясцовая ўлада дасьць дазвол на правядзеньне пікетаў, піша Bulletinonline.org.

«Хутчэй усяго, нам усім адмовяць, – гаворыць прадстаўнік Беларускай партыі жанчын «Надзея» Любоў Кавальчук. – У горадзе ў апошнія паўтара года не было ні аднаго дазволу на правядзеньне мітынгу або пікету. Але хай улада ведае, што людзей, якія гатовыя адчынена сказаць «не» самаўпраўнасьці і драконаўскім законам, становіцца ўсё больш».

Адзін з заяўнікоў пікетаў – чалец прафсаюза РЭП Аляксандар Рамаеў упэўнены, што абурэньне дзеяньнямі ўлад дасягнула той крытычнай кропкі, пасьля якой яго ўжо нельга стрымаць гутаркамі на кухні або ў курыльні на вытворчасьці.

“Да мяне ўсё часьцей падыходзяць людзі, выяўляюць падтрымку, жаданьне далучыцца да працы на дэмакратыю, – гаворыць ён. – Аб тым, што мы падалі заяўкі на пікет, паінфармуем гараджан як мага шырэй”.

Акрамя гэтага Салігорскі актыў дэмакратычных сіл гатовы ў выпадку адмовы ў правядзеньні пікетаў падаць у суд на райвыканкам, як на сыстэматычнага парушальніка правоў і свабодаў, гарантаваных канстытуцыяй.