Вінцук Вячорка запрасіў на Еўрапейскі Марш удзельнікаў канферэнцыі ў Швецыі :: Хартыя'97 :: Навiны

Дэлегацыя Партыі БНФ у складзе старшыні партыі Вінцука Вячоркі і яго намесніка Аляксея Янукевіча на запрашэнне былога і цяперашняга міністраў замежных справаў Швецыі Маргарэты аф Углас і Карла Більта знаходзіцца ў Вісьбю, выспа Готланд (Гоцкі Бераг), паведамляе “Радыё Рацыя”. Там праходзіць прадстаўнічая міжнародная канферэнцыя “Развіццё падзей у Паўночна-Усходняй Еўропе”, прысвечаная ўзаемадзенню краін Еўрапейскага Саюза і суседніх з імі.

У канферэнцыі бяруць удзел прэзідэнт Эстоніі Томас Гендрык Ільвес, старшыня партыі Саюз Айчыны (Літва) Андрус Кубілюс, былы эстонскі прэм’ер, галоўны эканамічны дарадца прэзідэнта Грузіі Міхаіла Саакашвілі Март Лаар, міністр развязання канфліктаў Грузіі Давід Бакрадзэ, былы прэм’ер-міністр Расіі Ягор Гайдар, віцэ-прэзідэнт групы Еўрапейскай народнай партыі ў Еўрапарламенце Гунар Гёкмарк, старшыня ПА АБСЕ Ёран Ленмаркер, дарадца ў міжнародных справах прэзідэнта Украіны Віктара Юшчанкі Алег Рыбачук, ценевы міністр нацыянальнай бяспекі Кансерватыўнай партыі Вялікай Брытаніі Палін Нэвіль-Джонз і іншыя, паведамляе прэс-група Партыі БНФ.

Беларускую сесію пад назвай “Асобная ўвага да Беларусі. Калі прыйдзе дэмакратыя?” вёў бургамістр Стакгольму, былы міністр адукацыі і навукі Пэр Ункель. Акрамя Вінцука Вячоркі, у ёй выступіў Андрус Кубілюс. Адбылася жывая дыскусія. Сярод іншага, Вячорка запрасіў усіх прысутных у Мінск на “Еўрапейскі Марш” 14 кастрычніка сёлета.