Беніта Ферэра-Вальднер: «Мы не можам працаваць з апошнім дыктатарскім рэжымам у Еўропе» :: Хартыя'97 :: Навiны

"За час, які мінуў з моманту падання дакумента, мы не ўбачылі ніякай рэакцыі ў адказ з боку беларускіх улад на нашы прапановы. Адчуваецца адсутнасць палітычнай волі для наладжвання супрацоўніцтва", – заявіла камісарка Еўразвяза па знешніх сувязях і палітыцы добрасуседства Беніта Ферэра-Вальднер 18 верасня на сустрэчы з беларускімі журналістамі ў Брусэлі. Яна адзначыла, што цяпер усе перамовы і кантакты паміж ЕЗ і Беларуссю застаюцца "на тэхнічным узроўні". "Мы не можам працаваць з апошнім дыктатарскім рэжымам у Еўропе", – растлумачыла яна.

"Мы гатовыя пачаць з Беларуссю паўнавартаснае супрацоўніцтва", – заявіла Беніта Ферэра-Вальднер. Для нас відавочна, што Беларусь з`яўляецца непасрэдным суседам ЕЗ і вельмі важна прапанаваць ёй тыя магчымасці, якія ёсць для іншых краін, што паўнавартасна ўдзельнічаюць у еўрапейскай палітыцы добрасуседства", – сказала еўракамісарка.

Б.Ферэра-Вальднер падкрэсліла, што ўсе прапановы ЕЗ выкладзеныя ў дакуменце "Што Еўрапейскі Звяз можа даць народу Беларусі". "Мы ў адказ чакаем паглыблення працэсаў дэмакратызацыі", – адзначыла яна.

Пры гэтым камісарка ЕЗ падкрэсліла, што найважнейшымі ўмовамі для пачатку супрацоўніцтва з`яўляюцца вызваленне палітвязняў, магчымасці для свабоднай працы СМІ, правядзенне свабодных і сумленных выбараў.