Выйшла кніга патрыятычных вершаў беларускіх блогераў :: Хартыя'97 :: Навiны

Гэтымі днямі ў інтэрнэце была прэзентавана кніга вершаў, складзеная маладымі карыстальнікамі Livejournal. Ідэя кніжкі з’явілася напрыканцы вясны 2006, пісалася з перапынкамі і, у рэшце, змясціла патрыятычныя вершы 10 маладых беларусаў, аздобленыя малюнкамі. Вершы прысвечаны змаганню за незалежнасць роднай Беларусі, яе гісторыі і штодзённым праблемам, ёсць таксама прысвячэнні палітвязням.

Вось што гавораць у прадмове самі аўтары-укладальнікі: "Кніжачка прысьвечана неабыякавым! Чаму менавіта неабыякавым? (спытаеце вы!)! І што ж такое абыякавасць. Абыякавасць характарызуецца няведаннем. Гэта слабасць душы. Чалавек не можа прыняць сваё (са ўсёй усвядомленай адказнасцю) суб`ектыўнае рашэнне - як яму дзейнічаць у дадзенай сітуацыі Больш таго, ён нават не жадае прадпрымаць якія-небудзь дзеянні. Вынік - чалавек застаецца спакойным знешне, але пры гэтым "пустым, сляпым" усярэдзіне. Але ж кніжачка прысьвечана не пустым людзям! Прыемнага чытання..."

Партнерамі праекту выступілі рух супраціву БУНТ, партал "Новая Эўропа", светлагорскі “Малады Фронт” і кампанія “Абаронім Беларускую Музыку”.

Мы, у сваю чаргу, віншуем аўтарам з дэбютам і спадзяемся на хуткі выхад кнігі ўжо не з віртуальнай тыпаграфіі.

Азнаёміцца з кнігаю "НЕабыякавым" можна ТУТ