Кіраўнікі місій краін ЕЗ у Мінску сустрэліся з Вольгай Казулінай і Таццянай Клімавай :: Хартыя'97 :: Навiны

Кіраўнікі місій краін ЕЗ у Мінску сустрэліся з Вольгай Казулінай, дачкой прафесара Аляксандра Казуліна і спадарыняй Таццянай Леановіч-Клімавай, жонкай спадара Андрэя Клімава з мэтай атрымання інфармацыі наконт становішча абодвух беларускіх грамадзян, якія лічацца Еўрапейскім Звязам палітычнымі зняволенымі.

Як паведамляе Амбасада Славаччыны ў Менску, кіраўнікі місій таксама выказваюць занепакоенасць у сувязі з нядаўнімі выпадкамі затрымання беларускіх грамадзян за палітычную дзейнасць. Кіраўнікі місій падкрэслілі, што ЕЗ і яго краіны-сябры працягваюць пратэставаць супраць пераследу ў дачыненні да беларускіх грамадзян і таксама патрабуюць іх вызвалення.

Кіраўнікі місій выказалі шкадаванне наконт таго, што нягледзячы на шматлікія дэкларацыі, зробленыя беларускімі ўладамі адносна жадання палепшыць адносіны з ЕЗ, гэтая палітыка абмежавання правоў чалавека, грамадзянскіх правоў і свабод беларусаў працягвае падрываць давер да такіх заяў.

Кіраўнікі місій ЕЗ зноў пацвярджаюць гатоўнасць ЕЗ да глыбейшага супрацоўніцтва з беларускімі ўладамі і намер уступіць у паўнапраўнае партнерства ў рамках Еўрапейскай палітыкі добрасуседства. Але ж гэта залежыць ад таго, як беларускія ўлады прадэманструюць пэўныя, істотныя крокі насустрач поўнай свабодзе выказвання, асацыяцый, сродкаў масавай інфармацыі, крокі, якія не маюць зваротнага ходу.